نشر نجم مسرح مصر محمد أنور منشورا عبر صفحته الرسمية على موقع التواصل الاجتماعي، تحدث خلاله عن اقتطاع تصريحات النجوم على السوشيال ميديا من أجل «الترافيك». وكتب أنور: «لو فتحت كومنتات أي بوست على الفيس بوك أو أي فيديو على اليوتيوب هتلاقي شتايم مهما كان المحتوى.. لو المحتوى بتاعك حلو هتلاقي شتايم بس مش هتتشهر.. ولو المحتوى وحش هتلاقي شتايم بس صاحب المحتوى هيتشهر جدا». تابع أنور: «علي الأساس ده بقت الأخبار والتصريحات والفيديوهات بتتكتب بطريقة تحس إنها عاوزة الناس تشتم في الكومنتات، المهم الريتش يعلي والشير يزيد حتى لو صاحب الخبر مقالش كده بالظبط، احنا نظبطها بحيث يكون قال كده فيتشتم أكتر». وأضاف: «بسبب ده فيه ناس مشهورة جدا، ونجوم جدا على السوشيال ميديا وبيطلعوا في برامج وبيمثلوا في مسلسلات وبيعملوا أغاني وبياخدوا جوايز وأي صورة بتنزل ليهم بتبقي خبر ومحدش يعرفهم في الشارع خالص، والعكس فيه ناس محبوبة جدا وأعمالهم ناجحة جدا في الشارع، والناس بتحبها وعاوزة تشوفها ومغمورين جدا على السوشيال ميديا». واستكمل أنور: «علي قد مابتدفع فلوس للصفحات والبيدجات والكوميكس على قد ماهتبقي نجم ومشهور وترند وناجح على السوشيال ميديا وهتاخد جوايز في المهرجانات، مش هتدفع خلي حب الناس في الشارع ينفعك، وأكبر دليل على كلامي ده شهر رمضان اللي جاي ده، هتلاقي مسلسلات مكسرة الدنيا على السوشيال ميديا وأبطالها في كل البرامج وفي الحقيقة محدش بيتفرج عليها، واللي ناجح بجد في الشارع لو مدفعش فلوس للسوشيال ميديا عشان يبين نجاحه ده ولا هيبان». وختم أنور منشوره قائلا: «أنا عارف إن كلامي ده هيتاخد منه اللي يخليني اتشتم بس، وهيسيبو اللي مش هيعمل ريتش».
