تَعْظِيم سلام

أيها السادة الكرام إحنا مش عايزين خصام
اللى مديون يوفى دينه أكل مال الناس حرام
شوف لنا مخرج يا خوجة البشر عايشين فى هوجة
لما تبقى السكة عوجة قول على الدنيا السلام
الأمل ممكن يصبر والحرامى مش معبر
كل يوم يقعد يدبر واحنا عاملينه الإمام
الزمن طول عمره غادر والوفا دلوقتى نادر
لما يبقى الباشا حاضر يبقى ممنوع الكلام
المنافقين هدوا بيتنا والمصايب دوختنا
واتعموا جدعان حارتنا واحنا تهنا فى الزحام
اللى يحتاج له يذلك واللى مديون لك يعلك
والمصيبة الناس تقولك مشى حالك والسلام
الكلام يظهر فرسكم هو انا صدعت راسكم
دانتوا عارفين اللى حبسكم واللى خلّوكم نعام
البلد طبعاً بلدهم واحنا شخشيخة فى إيدهم
شوف بقى كان مين ساندهم يوم ما حطولنا اللجام
المعلم كان فاقسهم بس سابهم ياكلوا عيشهم
هما بيربوا ف كروشهم واحنا رابطين الحزام
الخطب مالية الجوامع والخطر واضح ولامع
والمصيبة الكل سامع واحنا بيتنا مش تمام
مش كفاية نلوى بوزنا دا الأمل نفسه نبذنا
هوا فيه مخلوق يعوزنا واحنا عاجزين ع الكلام
طهروا بيتكم بإيدكم واقتلوا الخوف اللى فيكم
واما ييجى الخير عليكم اضربوا تعظيم سلام
الخلاصة م الكلام ده إحنا مش ضد النظام ده
إحنا عايزين المكان ده يبقى له هيبة ومقام