الرئاسة للجميع

حيث ان الرئيس اللى فات اتخلع يا رجاله ، حيث ان الحرية بدأت تطلع من الصندرة اللى كانت محشورة فيها ، حيث ان الدستور - لما هيتعمل ان شاء الله -هيبقى ملك للجميع ، فانا قررت ارشح نفسى للرئاسة ..
نزل ايدك منك له انا مش عاوز تصقيف ، مش انا ياد منك له اللى يضحك عليه بالبكش بتاعكم ده ، انا رئيس همشى على قاعدة الدستور ، احتمال على الحيط نفسه ، و انا مش هعمل زى غيرى و اقول انى قاعد 8 سنين حسب الدستور ، لا ، انا قاعد 4 سنين بس ، لانى هحقق برنامجى كله فى 4 سنين ، يبقى اقعد 8 ليه ؟؟؟
1- منع لبس البنطالون الجينز ، علشان بيجيب تسلخات .
2- حلا لازمة المياة ، اللى هيتمسك مرشوش قصاد بيته مية ، هيتحبس شهر و يدفع عقوبة 50 جنيه ( على فكرة اللى هيستعبط و يروح يكب المية قصاد بيت واحد مخنوق منه ، هيتحبسوا الاتنين ، اللى كب و الهفأ اللى سابه يكب )
3- حلا لمشكلة انقطاع الكهربا بسبب الحمل الزائد ، يمنع التلفزيون نهائيا ، تتكفل الصحف بحرية الاعلام – انا مش ديكتاتور خالص اهوه - ، يتم اختراع لمبات تعمل بالحجارة – بنمى الاختراعات اهوه علشان احنا دولة علمية - ، يقطع الكهربا لعدم وجود حاجة لها .
4- بالنسبة لمشكلة المجارى و الصرف الصحى ، يتم بناء البيوت فى الصحراء – بشجع التعمير و غزو الصحراء اهوه ، اجدع من امريكا لما غزت العراق - ، و بالتالى اللى محتاج يفضى يطلع فى الخلاء بره المدينة فى الصحراء ( متنساش تاخد معاك ميه ، بندقية علشان الديابة ) .
5- بالنسبة للامية ، بما ان المدارس مش بتعلم ، طورناها زى ما ماطورنهاش ، برضه مفيش فايدة ، يتم استغلال المدارس لحل مشكلة الاسكان ، تسكين الشباب ، الاكتفاء بالدروس الخصوصية ، مع العلم ان الامتحان هييجى من بره الكتاب لاننا دولة تشجع التفكير لا الحفظ .
6- الابقاء على درجات التفوق الرياضى و المستوى الرفيع ، خصم درجات من كل من يخرج بمظاهرات خاصة بالبند الخامس ، او بعد امتحانات الثانوية العامة .
7- منع دخول اللب و السودانى و الموبايل لمجلس الشعب ، علشان التهريج اللى كان بيحصل قبل كده ميتكررش ، يتم انشاء كانتين خاص للسندويتشات و الشاى فى المجلس ، يتم خصم 5 % من المكسب لصالح رئيس الجمهورية ، 7% لدعم الاقتصاد القومى .
8- بالنسبة للزراعة ، نظرا للمشاكل التى تعرضت لها مصر بسبب الكيماوى ، تأثير ذلك على الصحة ، نظرا لانخفاض خصوبة التربة التى تلزم البعض احيانا للاعتماد على الكيماوى ، سأقوم بهدم السد العالى لاعادة الطمى مرة اخرى لضفاف النيل ، زى ما وعدت الكهربا هنستعمل الحجارة ، بالشكل ده مش هنحتاج كيماوى و خير ربنا احسن .
9- بالنسبة للصناعة ، حيث ان المصريين يفتقدون للخبرة الصناعية و الايدى العاملة المدربة – راجع كتاب ثالثة اعدادى ، مش بجيب حاجة من عند اهلى - ، حيث ان المصريين هيبقوا مشغولين بالزراعة او الهروب من الفيضان ، قررنا استيراد الايدى العاملة المدربة ، و من اوروبا علشان انا مش بستخسر حاجة فى شعبى .
10- خوفا من الانحلال الاخلاقى نتيجة كثرة الاوروبين فى مصر بسبب القرار السابق ، قررنا مراقبة كل اجنبى فى مصر لمنع الهيىء و الهوء ، فاهمنى يالا منك له ، على ان يتم القبض على كل اجنبى متلبسا ، ينشر صوره فى جرائد الغد حتى يكون عبرة للاخرين ، تعويضا عن افلام المخرجين الشمال اللى اكيد هيتأثروا بانقطاع الكهربا .
11- الغاء العمل بالتوقيت الصيفى الملغى اصلا ، تدعيم العلاقات الخارجية مع الدول ، باستبداله بتوقيت واشنطن لضمان زيادة حصة المعونات ، على فكرة مفيش تجارة خارجية لاننا هنعيش على المعونات .
12- تغيير العيد القومى لمحافظة القاهرة ، ليناسب ذكرى عيد ميلا.... احم ، ليناسب ذكرى انتصار جماعة ناس كانوا معدين على شوية فرنسيين اثناء الحملة الفرنسية ، الفرنسى قاله وسع يا فلاح ، فالمصريين اتغاظوا و حققوا لمصر نصر عظيم بقتل الثلاثة جنود فرنسيين فى معركة شهيرة مش موجودة الا فى كتب تاريخ معينة – متشغلش بالك يعنى – و استشهد 6 مصريون فيها ، تبقى اتنين ، واحد اعدم لاحقا ، التانى هرب لفرنسا ، يوضع اكليل من الورد على ضريح الراجل اللى فرنسا ( يمكن ناخد منهم معونة هم كمان ) .
طبعا كل الكلام اللى فات ده من باب الهزار و المزاح فقط ، انا مش هرشح نفسى ، لكن علشان ننتبه لحاجتين ، مش معنى ان بقى فيه حرية ترشيح ، ان اى حد يرشح نفسه ، يتحفنا ببرنامجه الانتخابى ، لغاية دلوقتى معندناش اصلا معاد للانتخابات الرئاسية و لا نعرف اصلا هي امتى ، هتم على نظام ايه ، مصر هتبقى برلمانية و لا رئاسية ؟؟
ده طبعا غير ان فيه ناس كتير بتكلم بثقة عن نيتها الترشح بس علشان ياخد لقب مرشح سابق لرئيس الجمهورية ، مش علشان هو عارف انه هينجح ، طب ذنب الناس ايه ؟؟ و تشتت دماغهم ليه ؟؟ طالما مش هتفيد الناس ، يبقى احسن للناس انك تحفظ حقك فى الترشح زى ملايين من المصريين ، تنتخب الافضل .
الحاجة التانية و ده الاهم ، متخدش من حد كلامه و وعوده الانتخابية كلام مصدق ، انه هيحصل ، لازم تناقشه فيه و تشوف هيحققه ازاى . مش اى كلام بيتقال و خلاص ، زى ما شفت فى البيان اللى فات و فى البنود بتاعه ، انا ممكن اعدك بمشاريع فحواها جميل جدا ، لكن تحتوى على مصايب فى داخلها .
ممكن مرشح انتخابى يوعدك بحاجات كتير ، بدون وجود موارد او مصادر او جهود او امكانيات تكفى لاتمام الحاجات دى ، تلاقى نفسك بعد اربع سنين مخدتش حاجة من اللى بيقول عليها ، طب مين يحاسبه ؟؟
لازم كل واحد يتحاسب على كل وعد بيوعد بيه فى الحملة الانتخابية بتاعه علشان ميعلقش الناس فى الهوا ، لازم يتحاسب هتجيب منين يا عمنا قبل ما يتنقل على الوعد التانى ، فى نفس الوقت ، لازم رئيس الجمهورية يتحاسب على كل وعد وعده فى الانتخابات بيتحقق فعلا ، لا كان كلام و خلاص ، لازم يقدم تقرير فيه مدة زمنية و يتحاسب عليها .
اتمنى نكون فهمنا الكلمتين دول ، اشوفكم بعد 4 سنين كمرشح لان الناس ضغطت عليا اكمل 8 سنين .