مع انتهاء الساعات الأخيرة لشهر رمضان الكريم، وحلول أيام العيد، تتهافت الكثير من الفتيات والسيدات فى جميع أنحاء مصر، إلى الكوافيرات، ليتزين ويتجملن استعداداً لأول أيام العيد، فتصبح تلك الأيام هى موسم هذه المحال للمكسب. وتظل الكوافيرات الشعبية، محتفظة بأدواتها البسيطة، ومساحتها الصغيرة، وبزبائنها اللذين يترددون على المكان منذ سنوات طويلة، وتبقى لليلة العيد نكهة خاصة، تتمثل فى التجمعات الكبيرة من الجنس اللطيف. صفوف طويلة، من الأفراد والعائلات، منتظرين أدوارهن، ما بين كبار السن، الذين يتعدون الستين عاماً، وأطفالاً لم يتعدوا العشر سنوات، حكاية مختلفة تسمعها من الجالسين من الأعمار المختلفة، يقصونها على بعضهم البعض، ليقتلوا ملل انتظار الدور، جالسين، متفقين على شعار «البحث عن الجمال». تجلس إيمان، السيدة الثلاثينية، مع أولادها، بعد أن تناولت وجبة الإفطار فى منزل والدها، الذى جاءته فى زيارة، تقول: «ليلة العيد بالنسبالى كأنها العيد نفسه، باجى أنا وأولادى من محافظة القليوبية، للكوافير اللى جنب بيت بابا، واللى كنت بروحه قبل ما اتجوز، ومفيش عيد عدى عليا غير لما قضيته فى القاهرة، وفى الكوافير اللى اتعودت أروحه من زمان، دى طقوس اتعودت عليها وهفضل أعملها طول عمرى». بينما تقضى الأخرى الوقت فى الحديث مع أحفادها، اللذين وضعتهما على ركبتيها، تقول: «بنتى مهملة فى أولادها، ومتعرفش إنهم لما يروحوا الكوافير ويعملوا شعرهم هيفرحوا أوى، وأنا كنت بعمل كدة مع بنتى وهى صغيرة، عشان كدة قررت أعمل نفس اللى كنت بعمله مع أحفادى». جولات مختلفة يمكن أن تقوم بها فى المحال المختلفة، تجد فى إحداها مجموعة من أصدقاء المدرسة، تقول إلهام، إحدى الطالبات: «إحنا شلة أصحاب من المدرسة، بنتواصل مع بعض، وبنتجمع فى بيت واحدة فينا، وبنفضل سهرانين لغاية مايجى دورنا فى الكوافير، وبعد مابنخلص بنرجع تانى لنفس البيت نقعد نحكى للصبح لغاية صلاة العيد علشان بننزل نصلى مع بعض». البعض يشعر بالضيق والملل من طول الانتظار، فيقررن الذهاب بلا عودة، فيما يستغل بعضهن الطوابير والزحام لتشكيل حلقات من النقاش للتعارف والحديث عن أمور المنطقة والجيران والأهل والحياة، وتتعالى بينهم أصوات الضحكات، ويظهر على وجوههن البهجة والمرح، ويسمعون الأغانى ويرددونها سوياً. وعلى الرغم من غلاء الأسعار، إلا أن الذهاب إلى «الكوافيرات» ليلة العيد، أمر هام وضرورى للسيدات. لا تتمكن يسرا، صاحبة إحدى الكوافيرات، من الحديث إلا وهى تعمل، فالوقت لا يسمح بأى راحة، تقول: «كل عيد بيبقى عندنا أعداد مهولة من السيدات، وعلى الرغم من حالة الغلاء اللى إحنا فيها، إلا أن الكل بيجى ومش بيفكر هيدفع كام، لأنه شىء أساسى بالنسبالهم، وإحنا عشان فى منطقة شعبية، طبيعى الأسعار هتكون مش غالية أوى ومناسبة للكل، يعنى فى حدود 300 جنيه، تقدر البنت تعمل كل حاجة وتخرج من الكوافير مبسوطة وراضية عن نفسها وشكلها». كثافة العمل وزيادة أعداد الزبائن، تُجبر كثير من «الكوافيرات» لجلب عمال أكثر، تقول يسرا: «عشان نقدر نكفى كل الزباين، وبنفضل فاتحين بداية من آخر أيام رمضان، قبل الفطار وبعده». لا يقتصر موسم العيد فى «الكوافيرات» على فرحة البنات والسيدات بعمل شعرهن أو تجميل وجههن، بل إنه موسم للزواج، تستفيد منه المحال بأقصى درجة ممكنة، تقول يسرا: «فى عرايس، أفراحها وخطوبتها بتبقى فى العيد فلازم نفضى ليهم، ودول بنعاملهم بأسعار تانية خالص، وفى النهاية كل همنا إن الناس تكون راضية عننا، ويخرجوا مبسوطين، وأعتقد إن المبلغ اللى بيطلعلنا فى نهاية العيد بيبقى أكتر من اللى بنتوقعه، ودة بيحمسنا أكتر كل سنة إننا نحافظ على زباينا عشان يزيدوا». ويقول صبحى، أحد مصففى الشعر، «غالبية السيدات همها تغير لون شعرها وتعمل «نيولوك» جديد، وأنا عشان بقالى أكتر من 20 سنة فى المهنة، وليا زباينى اللى متعودين يجولى من زمان، بقوا يسبونى أعمل اللى شايفه مناسب ليهم وده يرجع لثقتهم الكبيرة فيا».
