نشر الدولي المصري أحمد حسن كوكا، المحترف في صفوف سبورتنج براجا البرتغالي، صورة له مع والده الذي وافته المنية قبل أيام قليلة، وألحق بها تعليقًا أبدى خلاله حزنه الشديد لرحيله. وعبر حسابه بموقع «فيس بوك»، كتب «كوكا»: «رحل أعز وأغلى وأطيب وأحن وأرجل أب في الدنيا بعد صراع كبير مع المرض، مفيش كلام يقدر يوصف اللي جوايا، أول مره ارجع مصر ولا أشوفك، كنت بتتألم وبتتعذب من الحقن والأدوية وعمرك ما اتكلمت وقولت تعبان، كنت مفروض تعمل العملية من 7 سنين أول ما اكتشفت المرض، مرضتش تقولنا عشان تجبلنا وتعملنا كل إلى نفسنا فيه، وفعلا عملتلنا كل حاجه، كل حاجه عايزنها لاقيناها، كان نفسك تشوفني من أحسن اللاعيبة في العالم، كان نفسك تشوفني مشرفك ومشرف بلدي، إخواتي كانو بيقولولي لما بجيب جون نفسيتك بتبقي عامله ازاي واد ايه بتبقي فرحان.. أنا بقولك اني هكمل وهفضل لحد ما أحقق حلمك وإني هشرفك وسط أهلك وإن هنفضل بجانب بعض أنا وإخواتي وأمي، وحاجة عن أمي يا بابا انت اخترت أعظم أم في الدنيا، عمرها ما اشتكت وهي بتعملك كل حاجة وانت عيان، فخور اني ابنك فخور أني أقول انا ابن الكابتن طيار حسن محجوب، ربنا يرحمك ويجعل قبرك روضه من رياض الجنه.... اللهم لا اعتراض، إنا لله وإنا اليه اجعون».
