ليه كنا بنخاف من عسكرى المرور و دلوقتى مبحترمش اشارة المرور و تخاف من حتة ورقة تتلزق على زجاج سيارتك و متفهمش يعني ايه تركن صف تاني ممكن حد يرد عليا؟؟ يعني ايه تركن صف تاني أنا متأكد إن نص الناس مش هتعرف ترد أنا أرد بقى اللى يركن صف تاني بيبقى فرحان بنفسه قوى و فاكر نفسه شاطر كان يورينا شطارته دي ايام ما كان فيه شرطة فى البلد لكن النهارده سعادته بيموت ناس و بيضيع مستقبل ناس أيواً تركن صف تاني معناه دكتور يتأخر على مريض بيموت في العمليات يعني عربية إسعاف مش عارفه توصل لواحد مرمي على جانب طريق زراعي مظلم مكسور و بين الحياة و الموت و الثانية بتفرق معاه يعني بنت بتعيط فى تاكسي عشان مش هتلحق الإمتحان يعني أم مروحة من شغلها حيلها مهدود و ولادها اللى رجعوا مالمدرسة مستنيين قدام الباب عشان تفتح لهم يعني راجل كبير في السن ميقدش يقعد بالساعات في مواصلة يعني وكيل نيابة مش قادر يوصل لمسرح جريمة عشان يعاين جثة ما يعني ظابط شريف مش عارف يحرك عربيته و يلحق الاشارة اللى جت له من اللاسلكي عشان يلحق جريمة قبل وقوعها ببساطة يعني واحد عارف إنه بيسرقني و يسرقك و مش فارقه معاه و مش عارف إن هييجي يوم ييجي واحد يسرقه و ساعتها دموعه مش هتفيده و عشان كده أنا بدعو الداخلية و المرور إنهم لو لسه هيطبطبوا عالناس يبقى ياريت يكتبوا المخالفات بتاعة الصف تاني دى و مايكلموش حد و لا يقولوله انت راكن مخالف ليه دا لو هيفضلوا واخدين تعليمات بعدم التعرض زي مبسمع من مصادر شرطية عشان لما كل بيه يروح يجدد رخصته يترزع كان الف جنيه مخالفات يبقي يقعد يعيط جنب الرصيف و يشيل عربيته بعد كده و هو رايح أي مشوار