أنا لسه راجع من فرنسا حالا كنت مشارك مع أحد مؤسسات المجتمع المدني , لمراقبة إنتخابات البرلمان الفرنسي , العديد من الأحداث الغريبة و المثيرة حدثت في الإنتخابات الفرنسية خلال الأسبوع اللي فات ده , الحقيقة أنا بذلت مجهود كبير علشان أغطي الإنتخابات دي تعبت جدا و إتعرضت للخطر و كدت أن أفقد حياتي أكثر من مرة... هحكيلكوا دلوقتي عن إنطباعاتي عن الإنتخابات الفرنسية كان يوجد مقدمات قبل بدأ الإنتخابات الفرنسية تشير إلى أنها ستكون إنتخابات ساخنة جدا , على سبيل المثال لا الحصر أغلقت الحكومة الفرنسية حوالي عشرين قناة فضائية على قمرها الصناعي المعروف " السين سات " أيضا تم إقالة رئيس تحرير جريدة من أكبر الصحف المستقلة المعروفة في فرنسا , و قبل الإنتخابات الفرنسية مباشرة و قامت الحكومة الفرنسية بالقبض على حوالي 1500 عنصر من عناصر جماعة الإخوان الفرنسيين المحظورة , إللي كان لها أعضاء في البرلمان اللي فات و كانوا مرشحين بعض من عناصرهم في الإنتخابات الحالية , و معروف للشعب الفرنسي إن دي وسيلة من وسائل الضغط إللي بتمارسها الحكومة الفرنسية على هذه الجماعة إللي بتقول عليها محظورة مع أنها كان لها أعضاء كثيرة في البرلمان اللي فات... سبق الإنتخابات أيضا مظاهرات في الجامعات الفرنسية و على رأسهم جامعة السوربون بعد منع حرس جامعة السربون الطلبة من وقفة إحتجاجية و فرض كوردون أمني على بوابات الجامعة و ضرب الطلبة بالقنابل المسيلة للدموع و الرصاص المطاطي ثم قام الطلبة برشق حرس الجامعة بالحجارة... نيجي للإنتخابات نفسها نبدأ أولا من العاصمة باريس , لاحظت ملاحظة غريبة , الراجل مدير متحف اللوفر كان مرشح نفسه عن دائرة الشانزيليزيه , تخيلوا أعطى للموظفين اللي في المتحف أجازة في يوم الإنتخابات , و نقلهم في الميكروباصات الخاصة بالمتحف إلي مقر اللجان , عيني عينك كده , راجل مش في دماغه البشر , جريء جدا !!! مش عارف أن الميكروباصات دي مال عام ؟ دائرة قصر فيرساي كما علمت تضم حوالي 200 الف ناخب , معظم اللجان في الدايرة دي تم إحاطتها بكردون أمني من الأمن المركزي الفرنسي , هذه الكردونات تمنع الناخبين من دخول اللجان على مرأى و مسمع من العالم كله و كان بيتم ملء البطاقات الإنتخابية لصالح مرشح معين بصراحة أنا أتخنقت من باريس و خت بعضي و طلعت على مدينة نيس عاصمة الريفيرا , دايرة بندر نيس بيسيطر عليها النزعة القبلية , أول لما دخلت مدينة نيس ذهبت الى إحدى اللجان و هي لجنة مدرسة نيس الثانوية بنات , شفت بعيني مجموعتين من البلطجية تابعين لإثنين من المرشحين , بيعجنوا في بعض بالسيوف و السنج و جميع أنواع الأسلحة البيضاء , أيه ده , هي دي إنتخابات و لا حرب؟ مارسيليا يتبعها دائرتين , دائرة مارسيليا المصيف و دائرة مارسيليا البلد , كالعادة دائرة مارسيليا البلد كانت أكثر سخونة , الناخبين إقتحموا لجنة مدرسة مارسيليا الثانوية التجارية المشتركة و حرقوا صناديق الأنتخاب , تخيلوا بجد حرقوا الصناديق بالبطاقات الإنتخابية إللي بداخلها أسفرت الإنتخابات الفرنسية على حصول الحزب الحاكم على حوالي 80 في الميه من المقاعد و الباقي جولة إعادة في بعض الدوائر بين الحزب الحاكم و نفسه و الحزب الحاكم و المعارضة المعارضة ممثلة في جماعة الإخوان الفرنسيين و حزب "لو وفد" الفرنسي عملوا حته حركة في إنتخابات الإعادة , معظمهم إنسحبوا قبل جولة الإعادة إعتراضاعلى التزوير اللي حصل في الجولة الأولى و سابوا مقاعد البرلمان للحزب الحاكم يشبع بيه , و بكده أصبح فيه أزمة في المعارضين , أوم الأمن عمل ايه , زور الإنتخابات في بعض الدوائر لصالح بعض المعارضين , علشان المجلس كله أغلبية و شكله هيكون وحش ظاهرة عجيبة شفتها هناك و مش قادر أستوعبها لغاية دلوقتي , الظاهرة إسمها شراء الأصوات , تخيلوا المرشحين بيدفعوا للناس فلوس علشان يعطوهم صوتهم؟ و الصوت الواحد ب 100 أو 200 يورو و أكثر كمان في بعض الأماكن , سمعت أنه وصل في مدينة كان ل 500 يورو اللي غايظني و هايجنني أنهم بعد كل ده بيسموها إنتخابات , مش عارف نفسهم مطوعاهم يسمو العجن ده إنتخابات إزاي؟ لأ و قيادات الحزب الحاكم بيقولوا عليها نزيهة كمان صعبان عليا جدا الشعب الفرنسي لأن دول مهما كان بشر زيينا و نفسهم إنتخاباتهم تكون نزيهه زيينا طبعا لا تقارن بأي حال من الأحوال بإنتخاباتنا النزيه المصدر http://shahat2010.blogspot.com/2010/12/blog-post_06.html