يا حلوة يا بتاعة الكوتة.. يا نايبة الشعب المسكين.. أنا نفسى أسمع زغروتة.. من القمر ست الحلوين.. كفاية صورتك ع الشاشة.. وأشوف عروض أحلى الفساتين.. أمانة يا حلوة كلامك.. مايكنش غير فى القوانين.. نفسى أغمض وأفتح.. مالقاش قدامى غير النساوين.. حاجة جميلة مسلية.. بالانتخاب أو بالتعيين.. وفى حبكم نبقى حكومة.. بلا مستقل ولا معارضين.. أمانة لو شفتى الريس.. قوليله إن الناس جعانين.. واحكيله عن سعر الكوسة.. بقت غالية على الملايين.. وخير بلدنا ماهش لينا.. مخصصينه لناس تانيين.. وخلى بالك من فرحى.. سرورى عزى دول غاليين.. لو نلتوا ياحبايبى رضاهم.. هتفضلوا دايماً قاعدين.. ياريت عددكم كان مية.. مش أربعة فوق الستين.. مفصلينكم للقوانين.. تزغرتوا وتقولوا آمين.. وتزفوا مصر لأحلى عريس.. زين الشباب أحلى السلاطين.. يا حلوة يابتاعة الكوتة.. يا نايبة الشعب المسكين.