■ ليه قضايا بتقوم وقضايا بتنام.. من غير إشارات ولا حتى كلام.. تحصل كارثة تاخد أيام.. بعدها نسمع بقى كله تمام.. حكومات شغلتها تبيع أوهام.. بتعيّشنا ليه فى الأحلام.. وكأن المصرى ده مغفل.. حيصدقها وحيقول يا سلام.. كارثة كبيرة ولا فى الأفلام.. ألف ضحية وعبّارة حطام.. وسمو القاتل ولا شرف..ولا حيشرف ميت سنة قدام.. حاميينه كبار ووحوش أشرار.. خايفين لو جه يكشف أسرار.. وساعتها الأمر ما يسلمش.. كل الّلى وراه حتطوله النار.. فالأحسن يفضل مخفى بعيد.. كتر خيره دفع التعويض.. ولا تقرير نافع ولا حيفيد.. ومسيرنا حننسى وهى أعمار.. فاكرين مذبحة بنى مزار.. كارثة خلت الكل احتار.. سرقوا الأعضاء ولا رحموهم.. ماتوا وماتت كل الأسرار.. بعدها قالوا دى عملة مجنون.. لو كان عاقل كان إيه الّلى يكون.. بعد براءته الموضوع مدفون.. وسكتوا ولبستها الأقدار.. لما التوربينى خد إعدام.. فجأة سكتت كل الأقلام.. ونسينا الكارثة الأساسية.. ورفعنا راية الاستسلام.. عمارات بتقع والناس بتموت.. وكأن أساسها من البسكوت.. قرارات إزالتها برشوة تفوت.. ووداع يا ضمير أهلاً يا آلام. هناء المداح- القاهرة [email protected] ■ وسكوت سكوت.. ولا أى صوت.. ما احنا فى تابوت.. اسمه الضغوط.. بعنا الدماغ.. وبقرش صاغ.. والظلم ماغ.. لحلفاء طاغوت.. ف القمة سادسة.. علماء غلاسة.. بعد الدراسة.. الغوا الشروط.. والعدو داخل.. كل المداخل.. قادر وطايل.. ومعاه ريموت.. سلاحه موتنا.. وبايده قوتنا.. وتمن سكوتنا.. زى النقوط.. ع الأرض واطى.. وليه تطاطى.. ونخاف نهاتى.. لا ياكلنا حوت.. وسكوت سكوت.. ولا أى صوت.. ما احنا فى تابوت.. اسمه الضغوط! مها حميد ■ يا عم مالك.. ماتشغلش بالك.. وخليك فى حالك.. علشان عيالك.. دا عم سكر.. حاول يفكر.. إزاى هيقدر.. ومنين يوفر.. زيت وسكر.. كحك وياميش ..طب فول وعيش ..لكن مافيش.. متزعليش.. يا أم العيال.. يا صابرة على الحال.. وشايلة الجبال.. لكن أقولِك.. من قلبى دعيتلِك.. ربى يباركلِك.. ويفرحك بابنِك.. تشوفيه كده دكتور كبير.. مالى مركزه ولا أجدع أمير.. ويمكن يبقى فى يوم وزير.. تفتكرى يومها هيقول إنه ابن الغفير.. عارف إن حلمى كبير.. مايقدر عليه إلا العلى القدير.. وعلشان حلمى دوه لازم أتكلم.. لا يمكن أسلم.. عايز حقى من البلد.. مش عشانى عشان مراتى والولد.. يا ناس حرام نعيش كده فى فقر ونكد.. الله عليك ياعم سكر.. سكت ليه ياعم سكر.. رحت فين ياعم سكر.. سمعهم كلامك ده وأكتر.. والا أقولك.. ياعم مالك.. ماتشغلش بالك.. وخليك فى حالك.. عشان عيالك! ريهام أبوتكة [email protected]