كتب الزمالك وجدو الفصل الأخير من المهزلة المضحكة فى ظاهرها، والمبكية فى حقيقتها لأنها تكشف الخيبة والتخبط والتدليس والمجاملة والتستر وكل حاجة غلط ممكن أن تحدث.. مسرحية فصولها كلها مقرفة من أول توقيع جدو للزمالك، حتى قبض الاتحاد الملايين من النادى الأهلى، هل فعلا قفل ملف جدو بعد كل هذا الضجيج والصياح والتشنج والاتهامات، أنا لا أصدق، كل هذا ينتهى بالمصالحة بين جدو والزمالك؟ وأين باقى الأطراف؟ أين نادى الاتحاد والنادى الأهلى ومنطقة الإسكندرية واتحاد الكرة؟ كله غسل إيده وكأن القصة لا تخص غير جدو والزمالك، ده معقول يا جماعة، القضية دى كلها تنتهى بنظام ماتزعلش منى أنا غلطان وكل واحد يبوس رأس الثانى، والله العظيم أنا مش باسخن الأمور، لكن ماينفعش اللى بيحصل ده. الموضوع تورط فيه الكثيرون، وتوقيعات، وإيصالات أمانة، وتغيير فى التواريخ، واتهامات بالتزوير والتدليس، وبعدين سامحنى أصل أنا عيل صغير ومش فاهم، والكبير يسحب الاتهامات والضربات القاضية اللى كان ناوى يسددها، أصبحت طرقعة أصابع، وكأن شيئا لم يكن، بصراحة أنا لو من رئيس نادى الزمالك وأعضاء مجلس الإدارة أتقدم باستقالتى، والأسباب عديدة، وأكيد أعضاء النادى وجماهيره لن يحزنوا أو يبكوا على الفراق. مش عيب إن الواحد يبقى مش فاهم ومش قادر، لكن العيب أن يعمل نفسه أبوالأذكياء وشمشون الجبار، أنا حتى الآن غير مستسيغ ما تم، وبعدين مليون و200 ألف جنيه بتوع إيه اللى هاتخدوهم من جدو، هو الراجل أخذ حاجة علشان يردها، ولاّ رمى جتت، أنتم نادى الزمالك قلعة كبيرة وماينفعش تنزل إلى هذا المستوى، طالما خسرتم الشوط اعترفوا بالهزيمة وصفقوا للى هزمكم وضحك وضحّك الناس عليكم. (وهو لما دفعتم الفلوس اتفضحتم والناس كلها عرفت إنكم سددتم الفلوس من جيبكم، عيب شكلكم وحش قوى).. ارحلوا. ■ أنا صعبان علىّ قوى الكاتبن سمير زاهر وهو محاط داخل مجلسه وداخل اتحاد الكرة بالسادة أعضاء مجلس شعب المستقبل، ما هو معظم المجلس ناوى على الترشيح فى الانتخابات القادمة وأيضا الإعلاميون، الراجل هايبقى خايف يتكلم يطلعوا يقطعوه فى الفضائيات، وإذا تجاسر واتكلم هاتبقى ليلة طين ممكن يعملوا فيه أى حاجة، وماحدش يقدر يكلمهم الكل هايبقى عندهم حصانة، الظاهر أن مجال كرة القدم بيفتح نفس اللى يشتغل فيه، إنه يبقى بتاع كله، إعلام ماشى، مجلس شعب ماشى، أى حاجة ماشى، وبصراحة برضه لانستطيع أن نلوم من يحلم منهم بدخول مجلس الشعب، ما هو نصف الشعب المصرى عايز يرشح نفسه فى الانتخابات القادمة والعدد فى الليمون، وكل واحد عايز يحصن نفسه، ولما تسأل أى واحد فيهم نازل ليه، يقولك غصب عنى، مضغوط علىّ زهقت من التليفونات، ويضيف: بصراحة الموضوع مش هايزودنى ولا أنا محتاجه. لكن يا عينى هو عايز ينزل علشان يخدم الناس والأهالى والشعب الفقير، حاجة تقطع القلب. ونلتقى الأسبوع القادم بإذن الله.. [email protected]