اصحى وسبّح رب البرية مشيت ارتّل وانشد واجوّد وصوتى يجرى بين النواصى هنا بانقّر.. هنا باعوّد هنا باحوّد عن المعاصى لو كنت بحرى لازم أقبّل وإن كنت قبلى.. لازم ابحّر ولحد آخر نفس ف صدرى هاشد قلبى وتر واسحر يا مصر قومى وشوفى نيلك يا مصر قومى وضمى سينا نهر المحبة بينتمى لك يا مصر شوفى إحنا فين رسينا مصر البهية.. بالعقل هية ف الذكر آية.. ف العشق غية اصحى وسبّح رب البرية.. ■ ■ ■ مسحراتى باقول حكاوى ياخدنى شوقى أقول غناوى واستفتى قلبى.. ألقى البراح فجأة لقيتنى باشوف بلاوى وناس كلامها زى المطاوى ووشوش كئيبة مافيهاش سماح ع الشاشة ولاّ على القهاوى شوفت الفتاوى.. لكل هاوى والفتوى صارت سداح مداح تقولش فتة والكل غاوى يهبش له حتة من العكاوى ومين يداوى ألم الجراح ■ ■ ■ يارد أدعو وأستجير من أى مفتى صاحب هدير ومن فتاوى شهرة وتجارة ومن فتاوى بئس المصير جاهل عصامى يطلع يقولك بدون مناسبة كلام خطير لو حوّا عايزة تخاوى راجل تديله رضعة وإن كان كبير يا مسلمين الفتاوى عايزة عالم مجاهد زى الضمير ■ ■ ■ افتونا علماً يا أهل الفتاوى دا الجهل خلى الضمير تهاوى يا سيدنا مالك.. مسك المدينة طهّر قلوبنا من القساوة شايل ف قلبك حكمة نبينا ليه النهاردة شايلين غباوة اللى بيعلم.. من حقه يفتى ليه اللى يجهل وياه تساوى.. ■ ■ ■ مسحراتى ف الذكر هايم والنسمة حلوة ولا حد نايم والكل صابح معانا صايم ف الفجر يدعى ويقول يارب رمضان يا أكرم م الشمس ذاتها أرواحنا عندك تبدأ حياتها والنفس راضية تلحق ما فاتها تطلب هداية وتقول يارب المصرى بَنّا وفلاح وجندى وعندى جامع.. وكنيسة عندى الرحمة من دا.. والحب من دى ومن قلوبنا بنقول يارب