ليس فانوساً فحسب، حيث ارتفع اسم أبوتريكة فوق لافتات البلح والياميش، منافساً بلح شيكابالا وعمرو زكى وبركات، وقمر الدين جدو الإسكندرانى، وهو ما طلبه تجار الياميش، حسب تأكيد مجدى المنياوى، أحد تجار الياميش، الذى أكد أنه ومعظم التجار طلبوا من أصحاب الشركات المستوردة للياميش تسمية أنواعه بأسماء لاعبى الكرة، خاصة أبوتريكة وجدو، وقال: «غالبية التجار وأصحاب شركات الاستيراد المتخصصة فى الياميش والمكسرات رفضوا إطلاق أسماء سياسيين على الياميش وفضلوا أسماء لاعبى الكرة، كل حسب ناديه الذى يشجعه، لكن الأغلبية فضلوا لاعبى الأهلى والمنتخب»، وأضاف: رفضنا أسماء البرادعى وأيمن نور، أصلنا مع الرئاسة، واللى نعرفه أحسن من اللى مانعرفوش، وبعدين جدو عمل إنجاز فى كأس الأمم الأفريقية وكمان انضم للأهلى، وعشان كده الإقبال عليه أكتر من أى منتج قمر دين تانى وأبوتريكة كمان». وقال مصطفى رجب، بائع ياميش: «مش عايزين مشاكل صعب نسمى الياميش بأسماء سياسية وبعدين لو سمينا الياميش باسم البرادعى أو أيمن نور هيصادروه فى الجمارك والأحسن إننا نسميه بأسماء لعيبة الكورة عشان الناس بتحبهم وهاتيجى تشترى قمر الدين حباً فيهم، خاصة جدو السنة دى عامل شغل كويس والإقبال عليه من أول يوم فى شعبان، وكمان أبوتريكة وبركات بس جدو أكتر عشان جديد السنة دى». ويقول الحاج محمد حمودة، صاحب شركة استيراد للياميش: «القراصيا والمشمشية ليس لها أسماء محددة، حيث يتم استيرادهما من المغرب وشيلى والأرجنتين وتركيا وسوريا، لكن قمر الدين والتمر ممكن تسميتهما على اعتبار أنهما منتجات مصرية والبعض يتم استيراده من سوريا.. وبناء على رغبة المستوردين وبالاتفاق مع الشركات المصدرة فى سوريا يتم إطلاق تلك الأسماء، سواء لاعبين أو فنانين». وأضاف: «الياميش سعره مرتفع هذا العام عن العام الماضى بنسبة 30٪، خاصة فى قمر الدين والمشمشية، بسبب قلة زراعتهما فى البلد المصدر، ولأن سعر الطن زاد من 700 إلى 800 دولار، كما أن الكميات المستوردة هذا العام ليست كبيرة لأن الحالة الاقتصادية للبلد ضعيفة والسوق تعبانة». وتختلف أسعار الياميش المسمى بأسماء لاعبين سواء قمر الدين أو بلح تبعاً لشهرة اللاعب وحجم موهبته وإنجازاته التى حققها على مستوى النادى والمنتخب.
