عايز أكرهك.. بس مش عارف ونفسى أحضنك.. وبرضه مش عارف وعايز أشطبك من كل الدفاتر جربت أبعد.. وأنسى بالسفر قضيت العمر كله مسافر وبرضه مش قادر ومش عارف.. عايز أجيبلك كلمة حلوة من قلبى بس مش طايل غير إنى أتفرج على حزنك من بعيد وأبعت كلمتين كل عيد وأستنى أى مناسبة للبكا وأشتكى الحال المايل.. تصورى عايز أغضب ومش عارف حتى شكوتى.. زعيق ودوشة وانفعال.. أشحت الحرية زى منحة عيد العمال.. واسكت بحجة خوفى ع العيال.. وحتى لما أسأل روحى ليه كده..؟ ألاقينى برضه مش عارف..