أنا آسف يا ريسنا أنا آسف لأنك ألف علي ميّة أنا آسف جايبلك ويَّايا هديَّة وجايبها وانا آسف! سنين راحت في خوف ومرار ومش جايّة وقطر صعيد بيولع نار وعبَّارة يائسة غرقانة في حوض مية وكيلو فتنة طائفيّة أنا آسف يا ريسنا سنين راحت بادوّر فيها على نفسي ومش لاقي وهوَّ العمر دا شوية؟!! أنا آسف يا ريسنا أنا آسف لأن الظلم عدى مداه في قريتنا ... في عزبتنا تلاقي كلهم جرابيع وفيه اتنين صحاب الجاه ولو مرة بينطق الجربوع بيلاقى الرد جاي في قفاه! أنا آسف يا ريسنا عشان عزّك معاه ملايين وإحنا غرقانين في الطين وطالع دينا في المنفى فليه عزو يكون كفة؟ واحنا كلنا ف كفة؟ وليه واقعين من الحسابات وليه سامع نفاق في نفاق وبتصدق كدابين زفة؟؟ أنا آسف يا ريسنا عشان مخي كدا اتلخبط فكيف بنقول ولاد صهيون ولاد ملعون!!! وهما أعز أحبابنا! وكيف يبقى الحشيش ممنوع ويتوزع - وبالمجان - على اصحابنا؟ وكيف يبقى البسيط همك وصابه نفس ما صابنا من استهتار (وحذرناك ميتين مرة ... هاتولع نار) وكيف يبقى وزير غالى ودم الشعب عنده رخيص وكيف يبقى وزير جبلي ونص الشعب راحوا فطيس وكيف يبقى وزير عادلي وبينه وبينا مليون تار وكيف محروسك اسمه جمال وما في حاجه تطلع منه تبسطنا؟ أنا آسف يا ريسنا على قلة أصول شعبك فرغم العز اللي قدامهم وشايفينه ما رضيوا يسبحوا بحمدك ولا يستغفروك ع العار!! ورفضوا يشكروا نعمك وعملوا فيها - قال - ثوار أنا آسف يا ريسنا ... أنا آسف هدايانا تجيب الغم والحسرة هدايا كلها عرّه أقول لك هات نبدلها هاروح ألحق أجيب لك شيء تطيب له نفسك الحرة أجيب لك إيه؟؟؟ أجيب لك إيه؟؟ لقيتها يا بيه! حزام ناسف!!!! أنا آسف يا ريسنا أنا آسف