مين اللى لسه ماماتشى فيكى يا مصر ؟؟ مين اللى فرط و اللى ورط واللى خاين والعميل مين اللى لسه ماسالشى دمه يا مصر؟؟ مين اللى هون و اللى حول فجر الضنا إلى قتيل نصرخ فى مين نلجا لمين ؟ و اللى حاميكى و مستخبى فى الكراسى و اللى مخاويكى و نفسه فيكى يامصر .. نشكي لمين؟ ************************* مين اللى لسه ماماتشى فيكى يا مصر ؟؟ مين اللى عايش واللى حايش عن عينيكى النور ؟؟ مين الى جوع واللى شرد و اللى لفق للحقيقة الزور مين اللى على السور مين اللى جاى له الدور ليه يا بلد ؟؟ قسمتنا فيكى قبور يا ام الشهيد الباكية لسه فى بورسعيد لمى الدموع و الحسرة ملو الكف لفى الدفة قبلى اسيوط هناك جسم الملايكة حتة حتة ع القضيب يترجى : سيبلى يا وطن فيك ذكرى واحدة بدون وجع كان لسه ليا حلم فيك فاكره يطيب لى ******* مستنى ايه يا شعب و انت كل يوم الموت بيخطف فيك عريس لَموا العيال متمزعين وفى قلب كيس و الصرخة مكتومة فى زور وقفت بعرضه المتاريس مستنى ايه يا شعب فُك عن البصيرة غماك اصرخ وثور مستنى ايه ؟ جر السواقى فى ضلهم اخره يجف البير و يندبح له الف تور ********* ااااااااااااااااااه يا بلد مين اللى لسه مماتشى فيكى اااااااه يا بلد بتبيعى لحمك و اللى منك واللى ليكى اااااااااه يا بلد قطعت ودانها و لسه برضه بنناديكى