قال الدكتور خالد فهمي، وزير البيئة، إن الوزارة قامت بعدة حملات استباقية للسيطرة على السحابة السوداء حيث قامت الوزارة بضبط 60 طن كاوتش و30 طن اسلاك اثناء حرقهما بإحدى القرى بالغربية وحملات لاغلاق مكامير الفحم بمركز أجا بالدقهلية ومركز المكامير الرئيسى بقرية ترسا بالقليوبية بالاضافة لرصد نقاط حرق قش الارز بمحافظة الدقهلية وكفر الشيخ والشرقية عن طريق القمر الصناعى وتوجيه اللجان النوعية لتحرير محضر ضد أصحابها بالاضافة لقياس عوادم السيارات بالشارع من اجل السيطرة على السحابة السوداء. وأضاف فهمي، في تصريحات صحفية خلال زيارته لمحافظة الدقهلية، الجمعة، لمتابعة مناطق تجميع قش الأرز ومصنع تدوير القمامة بالسنبلاوين والاجتماع مع متعهدى تجميع قش الأرز: «أنا مش هقدر أقضى على السحابة السوداء لكن انا بأعمل ضربات استباقية قبل الموسم وعندنا فرق طوارىء بوجهها إلى الأماكن المرصودة وقمنا بعمل موقع على الواتس آب لكل محافظة ومسئول الجهاز بيوصل له تقرير يومى بالمعلومات اللى بتوصلى انا شخصيا فيها حالة الجو يوميا وخلال يومين قادمين واتجاه الرياح ومناطق الحرق اللى بتظهر على القمر الصناعى وبنوجه الفرق إلى مكانها لتحرير محضر ضدها وبأربط التفتيش بالموقع وهو بياخد لقطات مرتين يوميا 12 ظهرا و12 مساءا وبأقدر أعرف من خلالها نقاط الحرق وأتعامل معاها». وأكد الوزير أن جميع الغرامات ستوقع بأقصى عقوبة على الفلاحين المخالفين لهذا العام، مشيرا إلى أن «الوزارة هتتابع المحاضر بنفسها وهناخد أرقام المحاضر ونسلمها للنائب العام وهنتابعها لحد متتوقع العقوبة والغرامة على الفلاحين اللى بيحرقوا قش الارز لأن للاسف كان قبل كده المحاضر على الورق». وحذر وزير البيئة مسئولى جهاز شؤون البيئة بالمحافظة من الجلوس في المكاتب قائلا «المسؤول مايقعدش على المكتب لازم ينزل الشارع ويشتغل ويتابع واللى هيقعد على المكتب مالوش لزمة عندى يؤوح يقعد في البيت» مؤكدا ان لجنة متابعة قش الارز بمحافظة الدقهلية لم تجتمع ولا مرة واحدة منذ تشكيلها وان في عقبات كتير بتظهر عند تطبيق منظومة تدوير قش الأرز ولازم اللجنة تعمل على حلها أول بأول « وأضاف «مش هنقدر نقضى على حرق قش الأرز ولا السحابة السوداء لكن لازم نسيطر عليها بحيث نقلل ضررها وده مش هيحصل وانتم قاعدين في مكاتبكم فكل قيادات الوزارة عندى بتخرج للشارع وبتمر احنا في تحدى وحرب ضد السحابة السوداء ولازم نحقق مكسب من خلال الامكانيات المتاحة أمامنا واحنا بنوفر المعدات وخلوا الناس تشتغل وتابعوهم» وخلال لقاء الوزير مع متعهدى جمع قش الأرز قال الوزير «أنا هتابع كل المواقع وهأمر عليها بشكل مفاجىء علشان اشوف انتم بتشتغلوا ولا لأ احنا وفرنا لكم المعدات وعايزين نتائج وانا بأحذر كم من استخدام المعدات في الحرث ولا في أي غرض غير تجميع وكبس قش الأرز لأننا هنقرأ العدادات يوميا وهنفحص الكاوتش وكل حاجة هتتكشف انا مهمتى اتابع المال العام واحافظ عليه انا مش خواجه وعارف الللى بيحصل كويس» وأضاف الوزير «الوزارة وفرت لكم المعدات بفائدة 4 % فقط علشان تشتروها وتشتغلوا طول السنة وكمان هنوفر لكم شركات تشترى منكم المخلفات الزراعية طول السنة يعنى اجمعوا انتم القش وانا اساعدكم في التسويق وعندنا مصانع محتاجه قش الارز والمخلفات الزراعية مكبوسة واحنا بتنفاوض مع الشركات الكبرى اللى تاخد منك منتجاتك احنا هنوصلكم بهم لكن ماليش في الاسعار انتم تتفقوا مع بعض يعنى احنا بنوفق راسين في الحلال وبس وانتم ممكن تشتغلوا وتكبروا» واشتكى المتعهدون من عدم تعاون الفلاحين فرد الوزير قائلا «انا مستعد اساعد في التوعية عندكم 48 موقع ومرشح يزيدوا إلى 55 حددوا بكل موقع ندوة وانا ابعت لكم الناس تفهم الفلاحين وتتكلم معاهم وعندنا بتوع الاعلام مابيعملوش حاجة فنستغلهم بقى في التوعية وأثناء الزيارة استوقفت حملة قياس العوادم المكونة من الشرطة والبيئة موكب الوزير والوفد المرافق له على طريق المنصورة أجا، وبدأت اللجنة في قياس عوادم السيارات. وأصر الدكتور خالد فهمي على قياس العوادم في سيارته وسيارة المهندس أحمد أبوالسعود، رئيس جهاز شؤون البيئة، وباقي سيارات الجهاز. وأكد الوزير أنه في حالة أظهرت نتائج القياس مخالفة لأي سيارة من سيارات الوزارة أو جهاز شؤون البيئة سيتم معاقبة سائق السيارة فورا، وتبين أن سيارته كانت مطابقة، بينما أكدت اللجنة أن إحدى السيارات الخاصة بأحد الموظفين المرافقين كانت مخالفة وتم تحرير محضر ضدها.
