بينزل من بيته ويبص في المرايه اللي في مدخل العماره...بيطمن على فرقه شعره وبيتأكد أن القميص داخل في البنطلون من ورا... بيخرج من باب العماره بيشد نفس هوا جامد ساقع وبارد...بيدور في جيبه على مفاتيح العربيه... وبيفتح الشنطه يدور.. بيفتكر أنه معندوش عربيه اصلا... بيقول ايه اللي جرالي !! كل ده عشان مشربش فنجان القهوه بتاع الصبح بيطلع على الطريق...بيجري ورا الميكروباصات عشان يركب وبرده مابيلاقيش مكان عشان نزل متأخر 10 دقايق.. وبعد نص ساعه بيركب رابع ورا..في عربيه مبتشيلش ورا غير 3 في رفع زينه الممثله ويلاقي جمبه 3 ممدوح فرج.. بييتزنق في النص...بيتمني يوصل بسرعه عشان يركب ميكروباص تاني يوصله للجامعه... السواق بيزعق وبيدور على واحد لسه مبعتش الاجره.. بيركن على جنب عشان الكلب اللي مدفعش... بيكتشف السواق أن حسين ابن خالته راكب معانا ومدفعش...فبيقوله خلي وبيحلفوا على بعض...فحسين بيخلي عادي يعني...ده ابن خالته بقي وياما كلو مع بعض فول وبيض...وهو يوم بيض أساسا بيدخل السواق بنزينه يمون...بيقف في طابور طويل عشان الازمه... وصاحبكم متأخر ومزنوق مع وحوش الWWf ورا...بيطلع موبايله...بيبعت لصاحبته على الواتس اب بيسألها المحاضره بدأت؟؟ بتقول له...اه انت فين !!...بيقولها في البنزينه...بجيب كوردون بلو من أون ذا رن...عشان عم سيد بتاع الفول مفتحش النهارده... ربعايه وابقي عندك.... وبعد نص ساعه...بيوصل الموقف اللي هياخد منه ميكروباص تاني للجامعه...بيركب بيقعد قدام جمب السواق على الفتيس عشان السواق مصر يركب اتنين قدام وهي ماتشيلش غير واحد... بيوصل بعد المحاضره مابتخلص بيقابل صاحبته...بيجبلها بيبسي Machine وواحد صن بايتس مخبوز من خير الطبيعه...بيقعدوا على كرسيين في الكافتيريا...بتقوله مش هتيجي تخطبني...بيقولها احنا لسه في سنه تالته..انا لسه باخد مصروف من أهلي...انا لسه بصور ملازم وبشتري اققلام رصاص واساتيك عشان الامتحانات ...بتقوله انت مبتحبنيش...بيقولها بلاش الاسطوانات دي.. بتشرب آخر شويه في كوبايه البيبسي لحد ماتسمع صوت خرفشه...وبتبص في الساعه... وبتاخد الكشكول عشان تمشي...وبتقوله كنت فاكراك راجل... بيبصلها من فوق لتحت... وبيسيبها تمشي عادي...بيشيل غطا الكوبايه بتاعه البيبسي...بيشرب البق اللي باقي وبيقرقش التلج...بيفتح كيس الصن بايتس اللي خلصته وياكل الفتافيت اللي في قعر اكيس...بيخرج من الجامعه... بيقف في الشمس مستني حاجه يركبها بيطلع الموبايل يلعب كاندي كراش... بينهمك في اللعبه...بيجي عيلين بمكنه صيني يشدوا منه الموبايل... وبيجري وراهم مبيلحقهمش.... بيسب ويلعن في البلد.. وفي اليوم اللي نزل فيه من البيت...بيركب ويروح...بيوصل بعد ساعتين...مش طايق نفسه... الحياه سوده...مفيش مزه...مفيش موبايل...مفيش كوردون بلو.في ايه ممكن يعيش عشانه !!.بيحط ايده في بريزه الكهربا عشان ينتحر..النور بيقطع... بينط من البلكونه...بيكتشف أنه في الدور الارضي..يدوب بنطلونه بيتقطع من عند ركبه... بيتخنق فشخ..بيحس أنه فاشل في كل حاجه...بيدخل ينام عشان يصحي تاني يوم بدري عشر دقايق عشان ميتأخرش...بيدور على الموبايل عشان يظبط المنبه...بيفتكر أنه اتسرق...بيقلع البنطلون والتي شيرت بينام بالبوكسر على البلاط عشان الجو حر..والنور قاطع والمروحه محروقه... بيدعي مايصحاش تاني... أو يصحي يلاقي نفسه في السويد أو المجر... وساب البلد دي...بينام من غير مايحلم...عشان مبقاش في احلام...النموس بيهري جسمه والعرق بيلزق قفاه... امه بتدخل عليه...تغطيه عشان ميبردش... وبتدعي في سرها "يارب بكره يبقي احسن يا ذكي يابني ".
