روت المؤلفة إنجي علاء، أحداث أخر لقاء جمعها بالمنتج الراحل حسام شوقي، الذي رحل عن عالمنا مع المنتجين الفنيين تامر فتحي، فتحي إسماعيل، ومحمود كامل إثر حادث أليم. وقالت إنجي عبر صفحتها الرسمية على موقع التواصل الاجتماعي "فيس بوك ":بحاول مافكرش من ساعة اللي حصل واهرب بأي طريقة من الواقع المرعب ده.. لسة مش قادرة استوعب..اخر مرة قابلت حسام لقيت فتحي قبلها ربنا يرحمه ويحسن إليه بيكلمني بيقولي على الميعاد.. استغربت لاني عارفة ان حسام وقتها كان مشغول ومسافر وكنا هنتقابل اما يرجع المهم حسام قالي: انا جيتلك في النص المكتب مخصوص بسرعة ولازم اسافر على طول وكانت مقابلة كلها اخبار مش كويسة وكانت حالتي النفسية ملخبطة والشغل وقصصه.. حسام كان مبتسم وهادي زيادة.. زي ما يكون في دنيا تانية.. كان في حاجة غريبة فيه وفكلامه مافهمتهاش وقتها.. فهمتها دلوقتي.. فهمت كنت عايز تقول ايه يا حسام..". وتابعت إنجي": "انا كنت عاملة زي الطفلة اللي كبرت في مكان وهي مش حاسة.. سنين شغل وشقى وفرح وعمره مازعل مني لما كنت اتضايق واتعصب عشان عارف قد ايه بحب الشغل وبخاف عليه..اليوم ده كان عايز يقولي ان الطفلة كبرت خلاص وانها لازم هتكمل لوحدها.. كان بيحاول يعرفني اكمل ازاي.. طلع كان بيودعني وانا مش فاهمة.. والله ما هنسى اللي قلتهولي والله ما هنسى كلامك ونصايحك ياخويا واستاذي وكل حاجة نضيفة وحلوة وأحلى ايام.. مش هنسى اكيد بس يارب اقدر اكمل في الدنيا الصعبة دي.. ربنا يرحمك يا حسام انت وفتحي وتامر ومحمود ويسكنكم فسيح جناته ويهونها علينا". يذكر أن أخر الأعمال التي قدمها حسام شوقي كمشرفا عاما على الإنتاج: المسلسلات الحشاشين، حكايات جروب الدفعة، بين السما والأرض، واللي مالوش كبير مشرفا على الإنتاج. ويقام اليوم الأحد عزاء للمنتجين الأربعة الراحلين من مسجد الشرطة في الشيخ زايد.