واصلت نهاد أبو القمصان، رئيس المركز المصري لحقوق المرأة، تقديم حلقات برنامجها الإذاعي "هى وأخواتها"، الذي يذاع على إذاعة صوت العرب، وهو عبارة عن مسابقة تقدمها كل عام في رمضان، حيث دار نقاش حلقة اليوم حول كيفية التخطيط لميزانية الأسرة. بدأت أبو القمصان الحلقة، بقولها "واحدة مرة جت قالتلي يا أستاذة نهاد يعني إنتِ ليل نهار عاملة تتكلمي عن حقوق المرأة والاستقلالية المالية يا ستي أنا بقالي 10 سنين بشتغل ومرتبي مزدش عن 1500 جنيه في ظل الظروف الصعبة اللي الناس عايشنيها دي استقلالية إيه وحقوق إيه، وأنا حاسة إني مبعلمش حاجة خالص ولا فيه أي حاجة بتعود عليا بفايدة من الشغل.. فسألتها ليه يا ستي إنتي بتعملي إيه ب1500 جنيه ؟ قالتلي بيتصرفوا." وأضافت أبو القمصان: "لابد من الوقوف على أوجه أنفاق الراتب الشهري للسيدات، فقلتها تعالي نحسبها إنتي بتروحي الشغل كام مرة في الشهر بتروحي 22 يوما لأن الجمعة والسبت إجازة، متوسط المواصلات بتعاتك في الشهر أد إيه طلعت تقربيا بتصرف مواصلات 250 جنيها طيب ومصاريفك الشخصية يعني مثلا بتأكلي بتجيبي سندوتش أد إيه طلعوا تقربيا زيهم 250 جنيها يعني دي كل مصاريفك.. طيب ال 1000 جنيه بتعملي بيهم ايه؟؟ قالتلي أنا بجيب شكولاتة لحمادة ابني لما بيكون عاوز حاجة حلوة وكمان لما بيكون مستواه في الدراسة مش كويس بجبله مدرسين وبدفعلهم فلوس الدروس، كمان بودي حمادة يلعب تمارين كاراتيه في النادي.. قلتها هايل إيه كمان قالتلي تقربيا كدا المرتب بيتبخر قلتها طيب وزوج حضرتك بيعمل ايه قالتلي بيدفع الايجار ويجيب اللحمة والرز والأكل والحاجات الأساسية، قلتها بالظبط كل الستات مرتبها بيضيع على شكولاتة حمادة، هل شكولاتة حمادة دي مش أساسية يعني هل البني آدم بطه بتتظغط يعني مبيعملش أي حاجة في الحياة غير أنه يأكل اللحمة والرز وقاعد في الشقة ولا البني آدم ده له متطلبات ممكن حضرتك تبقي مش حاسة بدخلك في البيت لأنه بيتصرف على حاجات من وجهة نظرك مش أساسية بس في الحقيقة هي أساسية، هي الفرق بين الإنسان وبين أي كائن تاني على وجهة الكرة الأرضية ". وأشارت أبو القمصان إلى أن العائد من عمل النساء يساهم في رفع جودة الحياة قائلة: "الستات في الدنيا لما بتشتغل شغلها بيساهم بشكل كبير جدا في رفع جودة الحياة لأننا مش كافية إننا عايشين نتظغط بس إنما الأهم إننا عايشين مبسوطين فلما نرفع المستوى التعليمي لحمادة وميبقاش عنده مشاكل في المدرسة دي حاجة أسياسية ولما نودي حمادة يلعب تمارين في النادي دي حاجة أساسية". واختتمت نهاد أبو القمصان الحلقة بتوجيه نصيحة للسيدات بضرورة وضع مخطط لميزانية الأسرة بناء على راتب الزوج والزوجة معا بهدف تحسين ورفع جودة حياة الأسرة قائلة: "اقعدي إنت وجوزكي وقوليه أنت دخلك اد كدا وأنا دخلي اد كدا ونحط أبو قرش على أبو قرشين ونعمل تخطيط للبيت ويبقي دخلكم انتوا الاتنين على بعض بيتحط في الإيجار واللحمة والرز وفي الشكولاتة بتاعة حمادة ودروس حمادة وتمارين حمادة وتحسي أن لكي لأزمة واللي لازم تتأكدي منه أنه من غير دخلك أكيد أكيد مكنش حمادة ولا أم حمادة ولا أبو حمادة هيعيشوا في المستوى ده أبدا". رابط الحلقة https://soundcloud.com/user-160861507/26a
