أترككم اليوم مع رسالة المواطنة أمنية سعيد عبد الرحمن علي صفحة »تجمع عشانك» علي الفيس بوك، كلماتها أبلغ تعبير عن قصة الطفل آدم وإهمال المسئولين بدار الحضانة الغالية جدًا بأرقي الأحياء بالقاهرة الجديدة، تقول: »أنا كنت في التجمع الأول رايحة مشواري الصبح وأنا ماشية بالعربية لقيت ولد شكله جميل جدا لابس حلو جدا وماشي بشراب في الشارع، وده اللي لفت نظري في شارع كله عربيات وطريق رايح وطريق راجع وقفت بالعربية وركنت ونزلت أنا وصحابي بتكلم مع الولد لقيته تقريبا 3 سنين مش أكتر، حاولت أكلمه عربي مفهمنيش اتكلمت انجليش رد عليا وقالي اسمه واسم باباه ومامته أنا ترجمت أنه فتح بابا بيته ونزل من غير ما حد يشوفه ((متوقعتش أبدا اللي حصل)) حبيبي فين البيت ابتدي يشاور وقولت أنا مش هسيبه غير في بيته شيلته ومشيت كتير علي حسب ما بيشاورلي وحسيت إنه مش عارف شوفت بوابين واقفين قولت هسأل يمكن حد يعرفه كلهم قال معرفش واحد فيهم قالي أنا بشوف الولد ده مامته منزلاه قدام الحضانة اللي علي الشارع برة، وهنا كانت الصدمة بنسبالي الولد خرج من الحضانة من غير ما حد يشوفه ولا يلاحظ ازاي؟؟ هسيبلكم انتم الرد قولت للراجل وديني الحضانة روحنا بعد مشي كتير وقعدنا نخبط علي الباب بتاع الفيلا اللي هيا الحضانة الانترناشيونال الكبيرة المحترمة اللي بتاخد مبلغ محترم علشان تسيب الولاد يخرجوا لوحدهم من غير حتي ما يلاحظوا ولا يكتشفوا ده حتي بعد خروج الولد بساعتين قعد الراجل يخبط وبعد حوالي 5 دقايق فتحوا وهما في منتهي البرود ومش مكتشفين أصلا وأول ما سألتهم علي آدم ابتدوا ينهاروا إزاي خرج إزاي والولد مرعوب منهم ومش عاوز يروحلهم واحد واقف قدام باب الحضانة بميكروباص قالي انتم أهل الولد ده قولتله ليه؟ قالي ده بقاله ساعتين نايم تحت العربية دي، جاء البوليس وكلمت بابا الولد واستنيته لحد ما جه واستلم الولد وهو بيقولنا باي بكل حب كأنه بيشكرنا من مجهول كان رايحله، أبوس إيديكم مش قد المسئولية متشيلوهاش احنا مسلمنكم قلوبنا وعمرنا. حرااااام. دعاء: اللهم لك الحمد والشكر حتي ترضي.
