علي الأقل لازم يبقي عندنا 30 مليون صوت في صناديق الانتخابات علشان نقول للعالم ان احنا شعب فهم الحكاية كويس اوي.. وعرف الفرق بين الخيانة والوطنية.. قبل ما اتكلم علي نزول الشعب العظيم يوم 26 مارس علشان نشارك في اختيار رئيس الجمهورية.. لازم نعترف ان المصريين في الخارج ضربو أروع الأمثال في الإخلاص والوطنية والرجولة ونزلوا وشاركوا بصوتهم وقدموا رسالة حقيقية للعالم اننا شعب بيقف جنب بلده وبيدعم الجيش والشرطة في الحرب علي الاٍرهاب.. يوم 26 لازم كل مصري وطني شريف ينزل هو وولاده ومراته ونروح كلنا لجان الانتخابات زي ما نزلنا يوم 30 يونيو وغيرنا التاريخ.. الفرصة جت تاني علشان نأكد للعالم اننا كنّا صح لما نزلنا واخترنا إللي يعرف يحكم مصر ويرجع ليها الهيبة من غير ما يخون ولا يكذب..مش مهم تدي صوتك لمين..الأهم انك تنزل وتشارك وبلاش نغمة ما السيسي ناجح ناجح.. مش المهم مين إللي ينجح.. الأهم اننا نثبت للعالم اننا شعب بيشارك بجد.. وحتي لو انت حاسس ان السيسي ناجح ناجح طب تعالوا نعملها احتفالية كبيرة ونرد للراجل الجميل إللي عمله فينا وأنقذنا وأنقذ ولادنا وبلدنا من الاحتلال الاخواني..في دوافع كتير اوي تخلينا ننزل نشارك في الانتخابات أهمها ان احنا لما نزلنا في 2014 واخترنا السيسي حال البلد اتبدل في 4سنين وبقينا بلد بجد.. وكمان الأمان رجع وكرامتنا رجعت ووضعنا اتحسن كتير..احنا لازم ننزل علشان نكمل المشوار علشان نضمن لبنتي وابنك حياة كريمة بجد ومن غير خداع.. انا متاكد ان الشعب المصري من يوم 26الي يوم 28 هيقدم درس جديد للعالم في الوطنية والاخلاص.. خلو بالكم يا مصريين.. كل صوت هيبقي في الصندوق هيكون رصاصة في قلب كل خاين.. يعني لو عاوزين ناخد حق الشهداء بجد لازم ننزل ونقول للخونة في الداخل والخارج ان دعوات المقاطعة والاكاذيب إللي عمالين تقولوها في قنواتكم المسمومة كلها تحت اقدام المصريين.. انا هنزل انا وولادي علشان أعلمهم ازاي يشاركو في اختيار الرئيس.. يا ريت كلنا نعمل كده.. وَيَا ريت كمان لما حد يقولك ياعم يعني هو صوتي إللي هيفرق تقوله ايوه صوتك هيفرق كتير علشان الخونة عاوزين يقولو للعالم ان المصريين مش راضيين عن الانتخابات وده عكس الحقيقية تماما.. صوتك وصوتي وصوت ولادك وولادي هيبقي اكتر من 30 مليون صوت بس لازم ننزل علشان خاطر مصر.. وخاطر دم الشهداء إللي ماتو وهما في عز شبابهم علشان انا وانت نعيش في سلام وأمان.. وتحيا مصر