انتقد الإعلامي عمرو أديب التعديلات الوزارية التي تمت، اليوم، مؤكدا أنها لا تحمل شخصيات لها رؤية باستثناء القليل، وأنها كانت تتطلب تغيير رئيس الوزراء، الدكتور هشام قنديل، في الأساس، منتقدا في نفس الوقت اختيار المرسي سيد حجازي لوزارة المالية. وقال أديب، في برنامجه "القاهرة اليوم" على "أوربت"، "الوزارة دي مشكلتها في راسها مش في ديلها، قنديل ليس هو الشخص المطلوب الآن لمصر الثورة والنهضة والأزمة، إحنا محتاجين شخص غير عادي ورئيس الوزراء عادي جدا ووزرائه عاديين جدا، ومحدش يقولي نجيب منين، عيب مصر مليانة عيال عباقرة، ومصر تستطيع النهوض بقيادات شابة، فين الشباب فين العيال اللي اتعلمت برة، فين قصص النجاح". وأكد أديب أنه يعلم السبب في تمسك الرئيس محمد مرسي بهشام قنديل رئيسا للوزراء، وأوضح "أنا عارف انت مخليه ليه؟ عشان الشهرين القادمين فيه حد لازم يشيل الليلة زي الأسعار والانتخابات وكل حاجة، طيب ليه البلد دي بيتعمل فيها كدة ليه؟، البلد دي فيها أمل كبير جدا بس مينفعش اللي يقودني ميكنش عنده رؤية أنا محتاج ناس جامدة". وأضاف "مصر مش قفا.. إنت مش حلاق تجرب فينا، إحنا بلد كبيرة في مرحلة حرجة عايزه اختيارات حساسة". وتساءل أديب "هو التغيير ده ليه؟ واللي فاتوا كانوا وحشين في إيه؟"، منتقدا اختيار المرسي سيد حجازي لوزارة المالية، بقوله "هو دكتور في الجامعة على عيني وراسي، لكن عمل إيه؟ أيه أهم انجازاته؟ ال"سي في" بتاعه إيه؟ ده ميعرفش يتعامل مع بتوع البنك الدولي".