«يعنى ايه استراتيجى دى؟».. سألنى صديقى محمد الميكانيكى. قلت له «عكس التكتيكى». قال لى: «هو أنا كنت فهمت الأولانية لما هتقولى التانية؟». قلت له: «بص يا سيدى.. الاستراتيجى متعدد الجوانب وطويل المدى. والتكتيكى أحادى التوجه وقصير المدى. والمفروض أن الاستراتيجى يتضمن عددا من الخطوات التكتيكية». هنا فتح صديقى فمه وبدا لى غاضبا. «اللهم طوِّلك يا روح، يا ابنى هو أنتم يا بتوع الكتب لازم تكلكعوا كل حاجة؟».. سأل صديقى وهو حاسس أننى بأتفلسف على الفاضى. قلت له فاكر سيدنا الخضر لما قال لسيدنا موسى «لن تستطيع معى صبرا»، أهو سيدنا الخضر كان عنده تفكير استراتيجى لأنه مثلا لما خرق السفينة كان يفكر على المدى الطويل وعلى أبعاد أكثر من مجرد سلامة السفينة، وإنما كان يخشى على السفينة التى لها أصحاب فقراء أن تضيع منهم سفينتهم، لأنه كان وراءهم ملك يأخذ كل سفينة صالحة غصبا. التفكير التكتيكى عادة مباشر وسريع ومرتبط بحل مشكلة جزئية، والتفكير الاستراتيجى يأخذ فى الاعتبار عدة مشاكل مترابطة ويحاول أن يعالجها بشىء من التخطيط؛ لذلك المعلومات مهمة وتوقيت اتخاذ القرار وتنفيذه لا يقلان أهمية. نفس الكلام مع النبى محمد (صلى الله عليه وسلم)، حين قبل بصلح الحديبية لما له من مكاسب مثل ضمان الحج فى العام اللاحق، وتأمين الجبهة الجنوبية للمدينة، والتفرغ لجهاد مشركى الجزيرة من غير أهل مكة، والأهم تقوية الجبهة الداخلية داخل المدينة نفسها. وهو ما رفضه بعض الصحابة مثل سيدنا عمر (رضى الله عنه)، بقوله: «لِمَ نعطَى (أى نقبل) الدنية (أى الدنو) فى ديننا؟». تفكير سيدنا عمر كان فى هذه اللحظة تكتيكيا مباشرا، وتفكير سيدنا الرسول كان استراتيجيا بعيد المدى. «فهمت يا عم؟».. سألت صديقى. «طبعا فهمت، ده أنا كمان استرتييجى».. قال محمد «ده أنا لما اخترت مدرسة لكريم ابنى اخترت مدرسة بعيدة عن البيت شوية وبأدفع فيها فلوس كتير علشان مدرسة كويسة ونفسى كريم لما يكبر يكون زى الناس المتعلمة، وما فكرتش تكتيكى بأن أدور على المدرسة الأريح والأقرب والأرخص». «بس ما دمتم فاهمين كده، أمال البلد ليه ماشية غلط؟».. سأل صديقى الميكانيكى. قلت له لأن معظم المصريين فى مجال السياسة اتعلموها سماعى، لا قرأوا تاريخ ولا فلسفة ولا منطق ولا علم نفس ولا علم سياسة، علشان كده إحنا لا بنفكر استراتيجى ولا تكتيكى؛ احنا بنفكر استراكيكى». «يعنى إيه دى بقى؟».. سأل صديقى الميكانيكى. قلت له: «يعنى إللى عايز يعمل حاجة يعملها الأول على أسس تكتيكية فتأتى النتائج الجانبية وغير المقصودة لتدمر ما كان يقصده، فلا يلوم نفسه على سوء تخطيطه وإنما يعتبرها مؤامرة ضده. يعنى مثلا لما بعض القوى الليبرالية والثورية طالبت بتأجيل الانتخابات من منتصف 2011، لم تكن تعرف أنها تعطى فرصة أكبر للإسلاميين، ولما صمموا أن تكون الأغلبية للقوائم فى الانتخابات لم يكونوا يعلمون أنهم يعطون فرصة أكبر للسلفيين، والمجلس العسكرى لما صمم أن تكون هناك عقوبة 500 جنيه ضد كل من لن يصوت، لم يكن يعلم أن هذا يخدم السلفيين تحديدا. مع أن كل هؤلاء كانوا خايفين من الإسلاميين لكن عملوا لمصلحتهم. ولما قررت القوى الوطنية الخاسرة فى الانتخابات أن تتحد بعد الحَكم ما صفّر (يعنى بعد الانتخابات) فى مجلس رئاسى، كل ده تفكير استراكيكى على أعلى مستوى. نظر لى صديقى محمد الميكانيكى بضيق وقال: «تصدق إنت خنقتنى، قوم من هنا».
