بالفيديو تعرف على الإسم الذي أطلقة أحمد آدم على مشروع النهضة بحضور شبيه مرسى إستضافت الإعلامية هالة سرحان، النجم أحمد آدم في برنامجها الساخر "هالة شو"، حيث رحبت به في برنامجها الذي تعتبره مدينة بعنوان طيبة ستان وقالت له مرحباً بك من جمهورية موريستان وبدا البرنامج بسخرية شديدة من الحال الذي كانت فيه مصر قبل رحيل مرسي وحكم جماعة الإخوان المسلمين. وسخر آدم قائلاً: أنا مبروحش بلد غير لما أشحت، إحنا عايشين في جنة إنتوا ليه بتتبتروا علي النعمة بس، إحنا بقينا بنقف في البنزيمة عشان نقيم علاقات ونتعرف على كل اللي فيها، هو في أحسن من كده، وبنعمل علاقات عشان نشرب مية مع أثيوبيا، وسد النهضة كل الرؤساء قالوا هنهدوا إلا الرئيس ده، الرئيس راح من هنا رجع من هنا قالوا هنعمل السد، مش عارف هو كان رايح يدي إشارة البدء ولا إيه؟. وواصل آدم: أكتر حاجة عندنا إتنين يتخانقوا ويرفعوا سلاح في وش بعض، عندنا إزاي بنعرف نتفاهم مع بعض بأسلوب حضاري، دلوقتي تقول لواحد إرجع يقولك لأ ده يطلع كلاشنكوف والتاني جراشنكوف ويتعاملوا، وعن جمعة نبذ العنف قال ده كان نُبذ عن العنف وكان بسيف الحب، وقبل ما ينجحوا كانوا عمر بن الخطاب وبعد ما نجحوا بقوا الحجاج إبن يوسف الثقفي، ويقولوا "إني أري رؤوساً قد أينعت وحان قطافها"، طيب ما تكملوا الثقفي وتقولوا "وإني للسلطان سيفاً وإني للشيطان طيفاً". وأضاف: مشروع النهضة وعندما واصل كلامه دخل شبيه "مرسي المعزول" في مكالمة هاتفية بالبرنامج وقال طائر النهضة محدش يعرف يفهموا غير واحد رومانسي، ومينفعش يبقي في تربص، وأنا أوعد الشعب المصري إني هوفر لهم مياه معدنية نقية، فرد آدم وبالنسبة للمياه المعدنية هتتوزع على البيوت ولا هنقف طابور زي البنزين، ثم قال ده طيب جداً ما تاخدوه عندكم في طيبة ستان، إيه اللي قعدوا مع ناس شريرة زينا. وواصل قائلاً: دلوقتي بقي مش هقول معلش إحنا بنتبهدل لأ دلوقتي معلش إحنا بنتشحور، معلش إحنا بنتفشخر، معلش إحنا بنتقسم"، كونداليزا رايس شبه عصاية الغلية مخبتش علينا حاجة، وقالت لنا مصر هتتقسم وهتبقي تلاتة، والمجلس العسكري لقوا الخريطة، وقالولنا هيكون في شرق أوسط جديد من تركيا للمغرب، وإحنا بننفذلهم المخطط أكتر ما هما بيحلموا بيه. وإستكمل، قبل الإنتخابات قالوا نفسي أمسك نفسي أحكم، نفسنا نعمل أي حاجة، وأول ما حكموا قالوا هي البتاعة دي بتشتغل إزاي، وقبل الإنتخابات قالوا نهضة وبعدها قالوا مناهضة، وكل حاجة وعكسها، ولما التركة تقيلة إيه اللي خلاكوا تشيلوها، وبعد الإنتخابات بقوا مضاربة وقبلها كانوا مشاركة، واللي يعارض بقوا كفرة، وقبل الإنتخابات قال لو يطلعوا 10 يعارضوني همشي وبعدها قال يطلعولي العشرة رغم إنهم طلعوا وما شافهمش.