أكد فتحي سند الناقد الرياضي أن أحمد سيد زيزو نجم الفريق الأول لكرة القدم بنادي الزمالك، يختلف عن إمام عاشور لاعب الأبيض السابق والأهلي الحالي. وكشف سند في تصريحات خاصة: «في ناس بتتكلم عن إن سيناريو إمام عاشور يتكرر مع زيزو، زي ما قولت مفيش حد بيحب نفسه أكتر من التاني، واعتقد إن زيزو مختلف عن إمام عاشور ثقافةً وفكرًا وأداءً، ومختلف عن كهربا ثقافةً وفكرًا وأداءً، ومختلف عن أي لاعيب، ودي وجهة نظر خاصة من خلال معرفتي». تابع: « لازم تقارن إمام عاشور بلاعيب يشبه إمام عاشور، عشان أقول أه ولا لأ، لكن زيزو بيفرق كتير عن إمام عاشور في تفكيره.. ومسألة الكباري دي هي موجودة، لكن في عالم الاحتراف الدنيا مختلفة جدًا مين يلعب فين مفيهاش أي مشكلة على الإطلاق». ◄ اقرأ أيضًا | خاص| فتحي سند عن زيزو: له مزايا كثيرة.. ولكن أضاف: «بتسألني عن إمام عاشور وزيزو، لأ فرق الثقافة والفكر الاحترافي موجود عند زيزو، ولو زيزو جتله ظروف أو مصلحة إنه يلعب في الأهلي ده مش معناه إطلاقًا إنه بيتنازل عن فلسفة في دماغه، أو فكر ماشي عليه، إحنا بس اللي عندنا استخدام كلمة كوبري كتيرة، وعلى فكرة بن شرقي خد الزمالك كوبري عشان يروح الريان، قعد يتكلم عن مفاوضات الزمالك، لغاية لما وصل للسعر الأقرب اللي هو عايزه واتكل على الله راح قطر». استكمل: «زيزو انتقاله مش هيكون عن طريق الكباري، هيكون عن طريق المصلحة اللي مفيهاش نوع من الضحك على الدقون، بما إن زيزو هو محور الحديث، فأنا مع السؤال اللي بيقول هل رحيل زيزو يحل مشاكل الزمالك؟.. مشاكل الزمالك فيها جزء كبير مادي، لكن في جزء أخطر من الجزء المادي، وهو الخاص بالعلاج الجذري للمشاكل اللي بتكبر كل يوم، داخل نادي الزمالك، مشكلة الأسعار الكبيرة للاعيبة اللي بتاخدها، مشكلة القضايا اللي الزمالك داخل فيها بالنسبة للاعيبة اللي ليها حقوق».
