تواصل «بوابة أخبار اليوم» نشر نص تحقيقات النيابة العامة في قضية تزوير عصام صاصا مطرب المهرجانات الشهير المتهم فيها برفقة شقيقه وآخرين، وعلاقة المطرب محمود الليثي بالقضية، والتي كشف من خلالها محمود الليثي تفاصيل لقائه بالمحامي محمد حمودة ليتولى الدفاع عن عصام صاصا، ومقابل الأتعاب في تلك القضية، وإلى نص أقوال المطرب محمود الليثي وكواليس التوكيل المزور. نص أقوال المطرب محمود الليثي في قضية عصام صاصا س/ ماهي معلوماتك عن واقعة عصام صاصا؟ ج/ اللي حصل أن أنا كنت لسه مخلص حفلة واتصل بيا حد في المجال وقالي ألحق عصام صاصا عامل حادثة وخبط واحد وجريت عليه على الدائري، ولما وصلت لقيت الراجل متوفي وعصام واقف وعربية الشرطة واقفة وعصام كان منهار وبيقول حق الراجل في رقبتي وعياله في رقبتي ليوم الدين ومرضيش يمشي وشيلنا المتوفي في الإسعاف وروحنا قسم الطالبية ولما روحنا عصام اتعرض على النيابة وخد إخلاء سبيل من القسم. وبعدها عصام صاصا كان عنده حفلة في دبي في الإمارات يوم 9 مايو وسافر بعد ما خرج من القسم عشان الحفلة دي. واستكمل محمود الليثي في أقواله: بعدها بيومين أو ثلاثة لقيت معاذ مدير أعمال عصام صاصا كلمني وقالي أنه في محامي اسمه محمد حمودة وعايزين نعرف اتعابه كام عشان عصام، وروحت لمكتب محمد حمودة فعلا في شارع البحر الأعظم وقعدت معاه أنا وصاحبي سيد واتفقنا على الأتعاب حوالي 2 مليون جنيه وبعدها مشيت وكلمت معاذ وقولت له خلاص الأمور تمام وده كل اللي حصل. س/ متى وأين حدث ذلك؟ ج/ هي الحادثة حصلت يوم 6 مايو على الطريق الدائري في اتجاه السياحي وروحنا قسم الطالبية وبعدها روحنا مكتب المحامي بعد ما سافر عصام صاصا بيومين أو تلاتة مش متذكر تحديدا. س/ ومن كان برفقتك آنذاك؟ ج/ كان معايا صديقي سيد ساعتها. س/ ما سبب ومناسبة تواجدك في المكان؟ ج/ أنا روحت لأنهم بيعتبروني أخ كبير لعصام صاصا. س/ ما هي علاقتك ب عصام صاصا تحديدًا؟ هو عصام صاصا أنا اتعرفت عليه في فيلم حمص وحلاوة وكان بيمثل دور وبيغني معايا وكان ولد جدع وغلبان فأنا اتصاحبت عليه وبقيت زي أخوه الكبير وبياخد رأيي في أي حاجة. س/ منذ متى بدأت تلك الصداقة؟ ج/ من أواخر سنة 2023 تقريبًا في شهر 9. س/ هل تلك العلاقة قصيرة المدى تجعلك تتوصل له في تلك الأمور؟ ج/ أيوة عشان هون واد جدع وطيب وغلبان. س/ ماهي ظروف تقابلك مع المدعو محمد مصطفى حمودة؟ ج/ هو اللي حصل أنه كلمني معاذ وكيل أعمال عصام صاصا وقالي إنه عايز مني أقابل المحامي ده عشان أتفق معاه على الأتعاب بس. س/ ولما قام سالف الذكر بالتواصل معك تحديدًا؟ ج/ عشان عصام ساعتها مكنش أحسن حاجة بسبب الحادثة والعربية بتاعته ادمرت، وبصفتي أخ كبير له طلبوا مني أتوجه للمحامي عشان يقبل القضية وعشان أسيب له جزء من الأتعاب وبعدها عصام يبقى يدهالي لما الدنيا تبقى كويسة معاه. س/ وهل توجهت للمكتب سالف الذكر؟ ج/ أيوة روحت وخدت معايا صاحبي سيد. س/ من هو المدعو سيد؟ ج/ صديق ليا ولعصام ومتكلمش نهائي في القعدة. س/ ما هي الحالة التي قمت بالتقابل مع محمد حمودة؟ ج/ لما وصلنا قعدنا في الانتظار عند السكرتارية وبعدين دخلنا في مكتب تاني وقعدنا معاه. س/ ما هي الفترة الزمنية المستغرقة في المقابلة؟ ج/ كانت حوالي ربع ساعة تقريبًا. س/ ما هو الحوار الذي دار بينكما؟ ج/ هو اتفق معانا على الماديات والأتعاب بس وكانت حوالي 2 مليون جنيه. س/ ما التصرف الذي بدر منك؟ ج/ خدت أستاذ سيد ومشينا واتصلت بمعاذ قولت له الراجل وافق على القضية مقابل 2 مليون جنيه. س/ هل المحامي كان على علم بوجود عصام صاصا في الخارج؟ ج/ أنا معرفش يعرف واللا لا بس القضية كانت مشهورة في الإعلام. س/ هل قدمت أي مستندات تتعلق بالقضية؟ ج/ لا مكنش معايا أي مستندات ومكناش رايحين عشان كدة أنا رايح عشان الاتفاق المادي بس. س/ ما قولك بما ثبت بتقرير أبحاث التزييف أن البصمة والتوقيع على توكيل عصام صاصا لشخص آخر؟ ج/ أنا معرفش حاجة عن التوكيل ده.
