ياريت فى الماتشات المهمة تقفلى الباب على جوزك وما تدخليش عليه لحد ما الماتش يخلص لو جوزك شخصية كروية لدرجة ان متعته فى الحياة انه يتفرّج على ماتشات يبقى الكلام ده ليكى بما إن الشهر ده بتقام فعاليات كأس العالم فى قطر؛ هوضحلك الطريقة المثالية للتعامل بين الزوج والزوجة طول فترة المونديال منعًا للمشكلات وحقنًا للدماء عشان الشهر ده يعدّى بأقل الخسائر الممكنة.. عزيزتى الزوجة ريموت التليفزيون طول هذا الشهر حقوق الملكية ليه راجعة للزوج فا من قصيرها لو عندكم تليفزيون تانى اتفرجى عليه ولو معندكيش تليفزيون قدامك حل من ثلاثة: يا تستعوضى ربنا وتحبى ماتشات كأس العالم وتستمتعى بيها مع جوزك يمكن تكتشفى ان ليكى فى الكورة وانتِ مش واخدة بالك.. يا تقسّطى تمن تليفزيون على سنتين بس يا رب يلحق يجيلك قبل المونديال ما يخلص.. يا تزهدى فى التليفزيون وتعتبريه مش موجود الشهر ده وتشغلى وقتك بالمذاكرة مع العيال اللى مُشتتين بسبب كأس العالم أكتر ما هم مُشتتين وتقنعيهم ان الامتحانات قرّبت.. بلاش سؤال هى مصر هتلعب امتى... مصر للأسف متأهلتش والموضوع ده واجع قلبنا كلنا فا جوزك مش ناقص انك تسأليه السؤال ده كل شوية وتنكدى عليه أكتر ما هو متنكد.. طالما مصر مش بتلعب يبقى بالتبعية صلاح مش بيلعب فا بلاش تجلطى الراجل وتقوليله كنوع من المشاركة هو أبو مكة مش باين ليه! بقولك احنا ملصمين الراجل بالعافية.. حذارِ تعدّى من قدام التليفزيون وحذار تتكلمى فى التليفون جنبه.. لو جاتلك مكالمة مهمة البسى وانزلى اتكلميها تحت البيت.. وياريت لو عندكم أطفال صغيرة تنيميهم من بدرى وتقعدى بيهم فى ركن بعيد عشان الدوشة.. هتسألونى هل ده طبيعي؟ هقولكم لأ بس زى ما قولتلكم ده حقنًا للدماء.. محدش فيه حيل للمشاكل.. كاس العالم بييجى مرة كل 4 سنين معلش نستحملهم بالطول والا بالعرض.. لو حضرتك ملكيش فى الكورة يبقى بلاش تنوى تتعلمى أساسياتها دلوقتى، حرام يبقى الراجل مندمج فى ماتش زى السعودية والأرجنتين وطاير من الفرحة بأداء السعودية وتفصليه بسؤال هو يعنى ايه فاول ويعنى ايه أوفسايد! مش وقته خالص! سيبيه يستمتع وهو شايف ميسى مغلوب فى صمت.. و أرجوكى بلاش تسأليه هى مصر هتلعب امتي!! احفظى معايا الأسماء دى كويس، أى ماتش بيلعب فيه ميسى .. كريستاينو.. مبابى.. نيمار.. معناه ان فى حظر تجوال فى البيت.. الراجل عايز يستمتع باللعبة الحلوة.. سيبوه ... ليڤربول مش بيلعب فى كأس العالم.. خليها حلقة فى ودنك.. برشلونة وريال مدريد مش بيلعبوا هما كمان فى كاس العالم.. ارحمى الراجل شوية.. اتعودى انك هتسمعى أغنية «هلا هلا هلا.. يلا حيهم ارحبوا..» 24 ساعة فى اليوم، لدرجة انك ممكن تحلمى بالأغنية وانتِ نايمة.. كل ده عادي.. واتعودى انك تسمعى صوت المذيعين فى الأستوديو التحليلى أكتر ما بتسمعى صوت جوزك فى البيت.. ياريت فى الماتشات المهمة تقفلى الباب على جوزك وما تدخليش عليه لحد ما الماتش يخلص احتياطى وده لمصلحتك.. عشان لا يتقال عليكى وشك حلو ولا وشك وحش وعشان متطلعش عصبيته لا عليكى ولا على العيال.. معرفش أومال لو كان المنتخب بيلعب كان هيتعمل فينا ايه.. وبأكد عليكى للمرة المليون اوعى تسأليه هو صلاح فين.. لو جوزك مش مشترك فى قنوات كأس العالم يبقى من حقه القانونى انه ينقل اقامته للقهوة، ودى مش قناعاتى الشخصية بس لو جوزك بيحب الكورة فا ده هيكون أمر واقع لإنه مش هيقدر يفوت ولا ماتش حتى لو بين ويلز وإيران.. الغدا ممكن يتأخر لحد ما الماتش يخلص، المشاوير ممكن تتأجل لحد ما المونديال يخلص، لو جالكم ضيف مهم ممكن يستنى فى الريسبشن لحد ما الشوط الثانى يخلص أو يدخل يتفرج مع جوزك.. أيهما أسهل.. الأولوية للمونديال وللماتشات سواء انتِ مقتنعة أو غير مقتنعة.. ياريت من أول ماتشات رُبع النهائى لحد النهائى تاخدى عيالك وتروحى على بيت الحاج والحاجة لإن الوقت ده حرج والرجالة بتكون على أعصابها ومحدش يسألنى ايه السبب! هتلاقيه قلقان على نتيجة الماتش أكتر ما كان قلقان عليكى وانتِ فى أوضة العمليات وبتولدى ابنه البِكري.. كل ماتشات كأس العالم مهمة، تعاملى على الأساس ده بدل ما تتعبي.. هتكتشفى فى جوزك مواهب وقدرات أول مرة تعرفيها.. هتكتشفى انه بيقدر يقعد قدام التليفزيون بال 12 ساعة بدون كلل أو ملل وبيشجع منتخبات عمره ما سمع عنها.. لو جوزك عاشق للكورة هتلاقيه بياكل وقت الشوطين ولو وراه حاجة هيعملها بين الماتشين.. غير كده هتلاقيه متمسمر قدام التليفزيون.. أبوس ايدك مصر مش بتلعب .. لو عايزة تطلبى حاجة من جوزك ويوافق عليها بدون نقاش استنى ماتش مهم واصبرى لحد ضربات الجزاء واطلبيها.. هيوافق عليها بدون نقاش حتى لو هتمضيه على كمبيالات.. هو فى دنيا غير الدنيا دلوقتي.. استغلى وقت المونديال لإن جوزك مش هيتخانق معاكى على أى حاجة لإنه مش فاضي.. لو اتحطله القلقاس اللى مش بيحبه هياكل الطبق كله، لو اشتريتى السُفرة الجديدة اللى ياما اتخانقتوا عليها مش هياخد باله.. اعملى اللى تعمليه فى الشقة بس أهم حاجة سيبيله الشاشة وكنبة أو كرسى يقعد عليهم وخلاص.. لو عايزة تسعديه بجد قوليله انا رايحة لماما كام يوم نقعد معاها شوية، هيحبك جدًا .. ما تتكلميش مع جوزك طول ما الماتش شغال وطول ما الأستوديو التحليلى شغال وبين الماتشات.. ما تتكلميش معاه وتصدعيه لحد ما المونديال يخلص.. لو انتِ بتحبى الكورة اوعى تشجعى فريق ضد الفريق اللى بيشجعه.. الرجالة بتزعل من الحركة دى وبتشيلها فى قلبها سنين.. مصر مش بتلعب. صلاح مش بيلعب. وأقسم بالله ليڤربول مش بيلعب. لو هتتفرجى مع جوزك كنوع من أنواع المشاركة قلديه بالظبط.. لو هيّص هيّصي، لو قال اللاعيب ده ملوش فيها أمّنى على كلامه.. لو قال دى كانت أوفسايد قوليله طبعًا دى مش عايزة كلام.. طول ما انتِ بتطبليله انتِ كده فى السليم.. لو جوزك بيحب يتفرج مع صحابه سيبيه ينزل يتفرج معاهم على القهوة بدل ما يعزمهم ويجولك فى البيت.. سيبيه ينزل يا فوزية... واهو تريحوا التليفزيون شوية.. بلاش تسأليه يعنى ايه VAR.. ادخلى من دلوقتى على جوجل واعملى بحث لوحدك.. الأستوديو التحليلى أهم من الماتش.. ما تتعبيش نفسك عشان تقنعيه ما يتفرجش... طول ما المونديال شغال اعتبرى نفسك فتحتى كافيه فى الشقة.. جهزى مشاريب وحلويات وشيبسى وساقع وسُخن عشان كل شوية جوزك هينادى عليكى ويطلب منك طلب شكل.. جمّعى كل طلبات البيت فى الفترة ما بين الساعة 11 مساءً لحد 12 الضهر تانى يوم.. وغالبًا ده وقت بيتخلله النوم وبعدها بينزل الشغل فا حضرتك كده اللى هتجيبى كل الطلبات واعتبرى جوزك ضيف خفيف معاكم فى البيت لحد آخر المونديال... الكلام اللى فات ده كله فى جزء منه واقعى رغم انه يظهر للبعض انه فيه مبالغة بس فعلًا ساعات كتير وقت كأس العالم بتحصل مشاكل كتير بين الزوج والزوجة وزى ما الزوجة المفروض تريّح جوزها وتسيبه يستمتع باللى بيحبه لازم برضه الزوج مينساش ان ليه زوجة وبيت وأسرة.. ولا ينفصل عنهم طول ما كأس العالم شغال... ويطوّل باله شوية على مراته وما يتعصبش على أتفه الأسباب.. ونداء أخير لكل زوجة: اوعى تسأليه على أبو صلاح.. ونتمنى للجميع مشاهدة ممتعة آمنة مفيهاش خناقات..
