لكل أم تجد صعوبة في نوم أطفالها، إليكِ حلا سحريًا للأخذ بيد طفلك إلى عالم الأحلام والنوم الهاديء.. «شيماء عبدالعال» تقدم مجموعة قصص يومية تساعدك على ذلك: حدوتة النهاردة ... «ياسين وأدواته المدرسية» كان ياما كان كان في زمان ولد اسمه ياسين، كان ياسين ولد جميل ومؤدب لكنه كان مهمل جدااااااا، ومش بيحافظ علي حاجته خااااالص وبان اهماله اكتر لما دخل المدرسة. وبدأت مامته تلاحظ انه كل يوم يرجع ادواته المدرسية ناقصة حاجه، يوم يرجع من غير القلم ولما مامته تساله فين القلم بتاعك مش موجود في شنطتك، كان بيقولها مش عارف يا ماما بقي تلاقيه ضاع مني، اتصلي ب بابا يجيبلي وهو جاي قلم جديد. وفعلا هو ده اللي كان بيحصل، يوم تاني يرجع من غير المسطرة ولما مامته تساله عليها يرد نفس الرد، مرة يقول نسيته علي الديسك ومرة يقول واحد صاحبي استلف مني القلم ومرجعوليش ومرة يقول وقع مني تحت الديسك وقعدت ادور ملقتهوش و مرة يقول دي اتكسرت مني و رميتها في الباسكت. مامته اتضايقت جدا منه وقالتلوا ان ده اسمه اهمال وانه هو انسان مهمل بيضيع حاجته ومش بيحافظ عليها وان باباه بيتعب في شغله عشان يجيب فلوس يجيبلوا بيها الادوات دي، لكن برضة كان كل يوم يرجع ياسين مضيع حاجة من ادواته وباباه طبعا يجيبلوا غيرها ادوات جديدة ولما مامته تعبت من الكلام معاه وانه مش بيسمع كلامها اخدت قرار حاسم عشان ياسين يبطل اهمال بقي. مامته قالتلوا بص يا ياسين اعمل حسابك بعد كدة انك تحافظ علي ادواتك لان الحاجه اللي هتضيع منك مش هجيبلك غيرها تاني ابدا، اخد ياسين كلام مامته علي انه هزار وتاني يوم رجع من المدرسة مضيع القلم بتاعه كالعادة وطلب من مامته تخلي باباه يجيبلو قلم جديد لكن مامته رفضت. قعد ياسين يترجاها لانه محتاج قلم ضروري لان عنده امتحان تاني يوم، مامته رفضت تماما وقالتلوا كان اخر تحذير ليك عشان تبطل اهمال، قعد يفكر ياسين هيعمل ايه بكرة وهيحل ازاي في الامتحان، قال خلاص ممكن استلف قلم من اي حد من اصحابي، راح ياسين المدرسة وطلب من صاحبه يديلوا قلم عشان يحل بيه لانه مش معاه، صاحبه قاله انه معهوش غير قلم واحد بس، قعد ياسين يلف علي اصحابة واحد واحد لكن ملقاش ولا حد يسلفه قلم. اتضايق ياسين جدا من نفسه لانه هو اللي حط نفسه في الموقف السخيف ده ومعرفش يكتب حاجه في الامتحان رغم انه كان مذاكر كويس وعارف الاجابات لكن مكنش معاه قلم يجاوب بيه ساب الورقه فاضيه ولما رجع البيت قعد يعيط و يلوم نفسه وحكي لمامته علي اللي حصل واتأسف لمامته ووعدها انه هيبطل اهمال و انه اتعلم درس قاسي اووووي بسبب انه مهمل ومش بيحافظ علي ادواته وطلب من مامته تسامحه لانه مش هيجيب الدرجه النهائية في الامتحان زي كل مرة لكن دي مرة ومش هتتكرر تاني ان شاء الله، وبالفعل اتغير ياسين خااااالص وبقي بيحافظ علي حاجته و مبيضيعهاش او يكسرها ورجع تاني يجيب الدرجات النهائية في كل المواد وطلع الاول علي مدرسته.