هاجم نائب رئيس حزب الوسط عصام سلطان، كل من وزير الدفاع الفريق أول عبد الفتاح السيسي، والإعلامي يوسف الحسيني. وقال سلطان – في تدوينة له على موقع التواصل الاجتماعي "فيسبوك"- قائلاً:"صعبان علي يوسف الحسيني أوي ، هو واللي زيه ، كل ما افضح السيسي في حاجة جديدة يخرجوا من تحت البيادة يشتموني ويرجعوا بسرعة تحتها تاني". وأضاف: "دايما يوسف الحسيني بالذات يشتم ويجري وهو مرعوب مني، وأهم حاجة يكون لواحده في البرنامج بتاعه وهو بيشتمني مع أن الونس حلو". وتابع: " آخر حاجة جابوهالي الشباب انه حاطط مستند منسوب لي وقال يعني أنا عميل أمن دولة، بس مشكلته أن الشباب طلعوا توقيعه متطابق تماما مع التوقيع في المستند، حتى التزوير مش فالح فيه يا يوسف .. كان ممكن لو شغلت مخك ، وأنا عارف إن ده صعب عليك ، كنت حطيت المستندات اللي كان حاططها شفيق قبلك من سنة بالضبط ، وبالمناسبة كلها على النت ، واتعاقب عليها بحكم نهائي بات من محكمة جنح مستأنف من شهرين ، وساعتها ممكن لما تتقفش تقول أنا مليش دعوة يابيه أنا واخد المستندات من شفيق ..ممكن مشكلتك تتحل لو كنت شيوعي بس لأنك احتمال تفهم فى يوم من الأيام ، وممكن مشكلتك بردو تتحل لو كنت فلول بس لأنك احتمال تتوب وترجع اللي أنت سرقته ونهبته ، بس صعب أوى أوى إنك تبقى شيوعي وفلول". وقال:" عموما أنا باطمنك ، خد راحتك عالآخر ، أنا علي 12 ضبط وإحضار و28 تهمة ، أقل واحدة فيهم القنص من أعلى سطح نادي الحرس الجمهوري للمعتصمين الساجدين ، فأنا مش هكون في محيط مدينة الإنتاج الإعلامي خالص ، أنا إما في رابعة أو في السجن ، ودي فرصة تعالج فيها نفسك من الخوف منى ..".
