أنا مش عارفة أبدأ إزاي.. بس أنا لازم أبدأ وأقول إني بحب واحد؛ لا مش بحبه أنا بحبه أوي أوي أوي، وهو كمان بيحبني أوي أوي، وده أنا متأكدة منه جداً.. بس دلوقتي المشكلة إنه جه في يوم مش بيرد على موبايلي خالص، وبعدها قفل الموبايل بتاعه يومين كده، كان أول مرة يعمل كده، وأنا استغربت جداً.. وبعدها قعدت أستنى إنه يتصل أو أي حاجة لقيته بعت ماسج بيقول لي إن إحنا مش هينفع نكمّل، وغصب عنه باباه كتب كتابه على بنت عمه المتوفى... أنا اتضايقت جداً جداً، وبعدت عنه وما كنتش عارفة أعيش حياتي خالص من غيره، وكان عندي حالة اكتئاب شديدة جداً، وبعدين اتكلمنا مرة، وبعدها اتفقنا إن إحنا نكمّل صداقة فقط. وفعلاً لما كان بيكلمني كنت باحاول أقرّب بينه وبين بنت عمه، وكان ربنا العالم أنا عاملة إزاي من جوايا، وهو كان مستغرب ويقول لي إنتي اللي بتقولي كده؟ إنتي؟ وبعدين ما قدرناش نكمّل الحياة من غير بعض، ورجعنا تاني؛ بس لما هو قال لي إن هو عاوزنا نرجع؛ قعد يحلف لي إن الوضع اللي هو اتحط فيه هيتحل، وإنه هيعمل أي حاجة عشان يخلص من موضوع بنت عمه، وأنا صدّقت ورجعنا على كده، ورجعنا شبه الأول ويمكن أحسن.. أنا بحبه أوي؛ بس مش عارفة أنا كده صح ولا إيه؟ محتاجة رأيكم بجد. ayooota