اللحمة تروي العطشان وتطفي نار الحران.. يا جمالها والطبق مليان وأنا عايم علي وش الفتة»..هكذا كنت ادندن عندما فاجأتني زوجتي قائلة: مش هتشوفلك حل بقي في الدولار ده اللي كل يوم طالع؟انتبهت فوجدتها قد وضعت أمامي مجموعة من الصحف وقد احتلت أسعار الدولار صدر الصفحات الأولي..وانهالت الأسئلة من الجميع علي العبد لله وكأني هشام رامز محافظ البنك المركزي.. فقررت الدعوة إلي اجتماع عائلي وطلبت من زوجتي ضرورة بث موسيقي خفيفة حتي يتقبل البنات أي قرار ثم قلت:أنا جمعتكم النهاردة عشان أقولكم اني اتخذت قرارا أرجو أن تعينوني عليه..فاذا بأسرار تهمس لشقيقاتها قائلة:يكونش بابا ناوي يتنحي ويسيب البيت؟ فسألتها: بتقولي حاجة؟ فقالت: أبداً يابابا ياحبيبي باقول اللي حضرتك عايزه احنا مستعدين ننفذه فورا..فإذا بالصغيرة كلمات تهمس في اذني:العيال دي مينفعش معاها الديمقراطية ادخل في الموضوع فقلت:انتوا عارفين لما الدولار بيطلع كده كل شيء بيغلي علشان كده أنا قررت منع دخول اللحمة البيت..ماهو يا اما تتعلموا يا اما تاكلوا لحمة فقالت يثرب:أيوه يابابا بس احنا اتعودنا ان اللحمة دي هي أهم حاجة في الأكل ومن غيرها الأكل ملهوش طعم..واذا بلقاء تقول:يابابا العمر لحمة أنا مش متخيلة الطبلية من غير لحمة ممكن يبقي شكلها ازاي..وأضافت وعود: يابابا اللحمة غذاء الروح..أنا ممكن ماسمعش موسيقي شهر وأكتر لكن مش ممكن أستغني عن اللحمة ولا يوم واحد..قلت:ده قرار نهائي والمقاطعة هي الحل..فقالت يثرب:بس يابابا لو كل حاجة في البلد يزيد سعرها نقاطعها يبقي كده هنموت من الجوع..قلت:خلاص نتحول إلي نباتيين نعيش علي البقوليات والخضار..فقالت لقاء: ومين قال ان الحاجات دي رخيصة ده كيلو الفول النهاردة بالشيء الفلاني والعدس مولع ثم يابابا معدش فيه حاجة من الخضار مضمونة والتلوث والمبيدات بوظت الخضار والفاكهة يعني اللحمة هي الحاجة الوحيدة اللي ممكن تكون مضمونة ده طبعا لو مكانتش لحمة حمير بعيد عنك!!.. قلت: يبقي مفيش قدامنا غير إننا نتحول إلي ناس مائيين يعني نعيش علي الميه وبس..أنا عارف انه علميا ممكن الواحد يعيش علي الميه مدة طويلة.. فاذا بوعود تصرخ: يابابا وهي الميه إللي نضيفة؟ مش هي سبب الفشل الكلوي قلت: يبقي نتحول لهوائيين ونعيش علي الهواء..أنا عارف ان الواحد ممكن يعيش علي الهواء فترة طويلة.. فاذا بيثرب تضرب كفا بكف وهي تقول: وهو يعني الهواء إللي نضيف ده معروف حتي ان احنا عندنا أكبر نسبة تلوث في العالم ثم إن اعتماد الناس علي الهوا ممكن يخلي الحكومة تفرض ضرايب علي الهوا إللي بنتنفسه.. فاذا بكلمات تتشعبطني وهي تمسك بأنفي قائلة: والحكاية دي مش من مصلحتك يابابا يا حبيبي لأن مناخير حضرتك كبيرة وكمية الهواء اللي هتسحبها هتكون كبيرة وبكده اللي هتوفره من مقاطعة اللحمة هتدفعه ضرايب تنفس.. قلت وأنا أتحسس أنفي : طيب هو مينفعش في الحالة دي أتنفس من فتحة واحدة؟! فقالت: دي بقي مشكلة تانية.. عملية تجميل واجراءات طويلة وموت ياحمارعلي ماتثبت للحكومة انك بتتنفس من ناحية واحدة!! قلت بحسم: اسمعوا بقي أنا قلت اللي عندي.. لحمة مفيش واللي مش عاجبه يخبط دماغه في الحيط فإذا بزوجتي تأتي بساطور ومجموعة من الأكياس وبسرعة شديدة وجهت لي طعنة في صدري.. وفي لحظات وجدت نفسي محمولا علي الاعناق وأنا أصرخ من الألم والبنات يهتفن: الكباب التام أو الموت الزؤام.. وإذا بالصغيرة كلمات تهزني وهي تعطيني كوباية ميه وتقول: قوم اصحي اشرب يابابا سلامتك..آدي آخرة الفرجةعلي برامج ريهام سعيد قبل النوم!!
