أثار قرار تعليق رحلات الطيران الروسية المتجهة إلي مصر وإعلان إجلاء الرعايا الروس منها ردود فعل واسعة علي مواقع التواصل الاجتماعي تويتر وفيسبوك, حيث دشن النشطاء هاشتاج أنا مع مصر الذي تصدر تويتر بعد ساعات قليلة من إطلاقه, فيما تداول عدد من المستخدمين بعض الصور لأماكن سياحية داخل مصر في إطار حملة قومية لتشجيع السياحة الداخلية يطالبون الوزارة بتفعيلها. كتبت ياسمين محمد: مقدرش أكون إلا في صف بلدي حتي لو في حاجات مش عاجباني لكن دلوقتي وقت الاصطفاف والبحث عن حلول للإنقاذ, وعلقت مها عبد الناصر قائلة: بصوا أنا فعلا مش فاهمة فيه إيه لكن كل اللي أعرفه إن فيه ناس بيوتها هتتخرب وفيه عائلات هتتبهدل فأنا شايفة ان كل المصريين القادرين لازم يوجهوا رحلاتهم الفترة الجاية لخدمة السياحة الداخلية ومطلوب كلنا نسافر في الكريسماس و رأس السنة وفي أجازة نصف العام لشرم الشيخ والغردقة وأسوان, أرجوكم محدش يسافر بره مصر لأن كل المصريين اللي بيشتغلوا في قطاع السياحة محتاجين دعمنا, متصرفوش فلوس بره البلد, الناس تعبانة ومش هيستحملوا الخراب اللي جاي ده. كما طالب أحمد حسين بسرعة التحرك ونشر الوعي بشكل غير مسبوق لأن الوضع لا يحتمل أي تأخير لإنقاذ آخر ما تبقي من السياحة, وكتبت ريم عادل لو إنت قررت تقف في صف الشامتين لأي خبر كارثي يهدد مستقبل والأوقع أنه بيهدد حاضرها يبقي تتنازل عن جنسيتك أفضل وتروح تشوفلك بلد تانية تنظر فيها من هناك إنما الوضع الحالي محتاج حلول للأزمة اللي مصر بتتعرض لها محتاج ناس عندها رؤية ومحتاج ناس بتحب البلد بجد, وقالت هبه محمود: ربنا يعين اللي بيشتغلوا في السياحة, كل ما الدنيا تتظبط شوية تحصل حاجة تبوظ الدنيا, لازم نساعدهم يا جماعة ونساعد البلد.
