أعلنت المطربة إيناس عز الدين إصابتها بفيروس كورونا المستجد، وتخضع حاليا للعلاج المكثف داخل منزلها بالتنسيق مع وزارة الصحة. وكتبت إيناس على صفحتها الشخصية على موقع التواصل الاجتماعى فيسبوك، "الحمد لله حتى الآن أنا حالتي مستقرة إلى حد ما وفي حجر منزلي لوحدي ومش بختلط بأي شخص وبلتزم بالإجراءات الوقائية المُتبعة وكل ده طبعاً بالمتابعة مع وزارة الصحة؛ إلا إذا الحالة ساءت ساعتها بيحصل عزل طبي في أحد مستشفيات الحجر الصحي ..وده الإجراء المتبع من قبل وزارة الصحة معايا ومع ناس كتير وده بروتوكول مُتبع في العالم كله مش في مصر، وأن الحالات السيئة بس هي اللي بتدخل عزل صحي في مستشفيات ومافيش حاجة اسمها لو مريضة انزل أي مستشفى عادية جنب بيتي". وشرحت إيناس سبب تواجدها في منزلها بعد الإصابة "نزولي المستشفى وأنا مصابة معناها إني هعدي كل شخص في طريقي.. ومافيش مستشفى مجهز لاستقبال حالات إلا المستشفيات المخصصة من قبل وزارة الصحة ودي الوزارة اللي بتحول عليها الحالات اللي محتاجة إنها تتعزل في مستشفى والفيرس ليه درجات فيه درجات بتتابع من البيت مع وزارة الصحة وبيتعملها حجر صحي منزلي وفيه حالات بتتدهور فيتم إدخالها العزل الصحي بالمستشفيات ...وده نظام متبع في العالم كله وأنا حالتي تستدعي الحجر المنزلي حتى الآن الحمد لله". وكشفت إيناس "الأعراض معايا كحة جافة جداً ..نشفان ريق.. ألم شديد في الحلق مع صعوبة في البلع.. وألم بحرقان شديد في منطقة الصدر.. كأن طوبة على الصدر.. وهن وضعف شديد.. وألم في الجسم مع صداع ودوخة بسبب عدم وصول الأوكسجين بشكل كافي بسبب صعوبة التنفس مافيش حرارة حرارتي مش بتتخطى 37 ونص.. وده لأن الجسم لسه ما وصلش للمرحلة اللي يتهاجم بشدة من الفيرس فتبدأ الحرارة ترتفع علشان تهاجم الفيروس". وطمأنت المطربة جمهور متابعينها "مافيش أي داعي للذعر ولا نشر الهلع بين الناس أبداً ..ولا فيديوهات صريخ وصويت ولطم... كل ده بيخوف ويرعب الناس وبيخلي فيه طاقة سلبية تخلي ناس كتير من الخوف تتوهم المرض وتخلي المناعة تضعف لأن العامل النفسي بيرفع المناعة". ووجهت إيناس من خلال فيديو توضيحي عدة نصائح "وزي ما قولت في الفيديو توخوا الحذر.. واعملوا اللي عليكم ولكن دون فزع أو نشر هلع بين الناس.. لأن الناس فعلاً مش متحملة... انشروا طاقة إيجابية وكلموا الناس عن كام حالة اتحولوا من إيجابي لسلبي وكام حالة خفت وخرجت من المستشفى... وكام حالة عملت حجر منزلي وحالتها كانت بسيطة واتحسنت وهي في بيتها". وشرحت عز الدين طرق العلاج التى تعكف عليها قائلة: "مافيش حاجة حتى الآن اسمها علاج كورونا ... الإجراءات المتبعة معايا في حالة الألم أو التهاب الحلق أو الصداع... أخذ باراسيتامول أو بنادول أو أدول 500 وتقوية المناعة بفيتامين دي وفيتامين سي وكل الخضار وفواكه تحتوي على فيتامين سي زي البرتقال والكيوي والليمون والموز وشرب سوايل دافية... والابتعاد عن المشروبات الباردة ووقف السكريات نهائيا". وأرجعت إيناس سبب انتقال العدوى لها "الفيرس انتقل ليا وأنا راجعة من المغرب من أسبوعين في الطيارة عن طريق شخص كان مصابا، وما قالش هو كان عارف وتم اكتشاف إصابته لما وصل مصر".
