نشرت صفحة خالد سعيد، شهادة أحد شهود العيان عن واقعة تعطل مترو الأنفاق بسبب انقطاع الكهرباء، صباح اليوم الخميس، وروى أحمد عبد الحميد الذي نشرت صفحة خالد سعيد قصة معاناته ودقائق الرعب داخل مترو الأنفاق، وقال أحمد عبد الحميد "انا كنت جوة المترو.. والمترو اتعطل داخل النفق بين محطتي السيدة زينب وسعد زغلول، وبعد مرور ربع ساعة ومع الزحمة الشديدة، الناس بدأت تحس باختناق وفضلت تخبط علي أبواب عربات المترو، فالسواق فتح الابواب، وبدأ الناس تنزل خارج المترو، وتمشي جزء اتجة ناحية السيدة والباقي اتجة إلي محطة سعد زغلول". وأضاف شاهد العيان قائلا "بعد ما وصلنا لنهاية النفق في اتجاة سعد زغلول وضيق السلم اللي الناس بتطلع عليه وسط الحر والعرق الشدبد، اتفاجئنا أن المترو اتحرك باتجاه محطة سعد زغلول، وطبعا الناس اتجننت، لانه كان حيدوس علي الناس اللي ماشية أو واقفة مستنية دورها تطلع علي سلم المحطة". واستطرد قائلا " فضل الناس يصرخوا علشان السواق يوقف المترو، وبدأت الناس ترمي حجارة علي غرفة السائق علشان يقف، لحد لما وقف، ولما اتجهنا لأمين الشرطة علشان نبلغ عن اللي بيحصل، قال لنا: وأنا مالي.. أعمل له إيه يعني؟.. قلنا له: بلغ حتي الداخلية أو هيئة المترو.. قال لنا: وأنا مالي.. وقفل علي نفسه باب المكتب. يذكر أن انقطاع الكهرباء صباح اليوم الخميس قد أدى لتعطل خط مترو الأنفاق.