يااااه على حجم الوجع والألم، والقهر اللى حرق قلبى وقلوب كل المصريين واحنا بنتابع تفاصيل مصيبه سيده المنيا سعاد ثابت "70 عاما" وهي التي تم تجريدها تماما من ملابسها وزفها بوحشيه وسط أهل قريتها قريه الكرم ، لا لن أقول السيده القبطيه فهى سيده مصريه ( من إمتى إحنا بنصف بعض مسيحى ومسلم وخاصه الامهات .. هى أمى وامك .. أيوه تعامل معها أنها أمك علشان تحس بوجعها ووجعى ووجعك) . قالت السيدة البسيطة وهى تتحدث عما جرى معها بلهجة تلقائية " فى محضر الشرطه بهدلونى يا بيه حرقوا البيت ودخلوا جابونى من جوه، ورمونى قدام البيت وخلعونى ، هدومى يا بيه زى ما ولدتنى أمى مخلوش حاجة حتى ملابسى الداخلية وأنا بصرخ وابكى ، وبعدين ربنا خلصنى من ايدهم ، وناس خدونى جوه بيتهم اخدت جلبية قديمة ولبستها وبعدين ، جات الناس تساءل علي فرد اهل البيت وقالوا لهم مش موجوده". وأضافت السيدة: "أن من قام بهذه الجريمة هم " نظير اسحق أحمد وهو زوج السيدة المسلمة ، ووالدهم اسحق احمد وشقيقه عبد المنعم اسحق احمد. وتابعت: لتقول "ابني اشرف ملوش علاقة بالست المسلمة وهى جات المركز وقالت إن زوجها نظير بيشهر بها ورفعت قضية، وهو عمل كده علشان يطلقها ، ولكن احنا اتبهدلنا وكل بيتنا اتحرق وجوزى ضربوه وأنا لحد دلوقت مش قادرة اصلب جسمى بعد ما ضربونى". بكت السيدة بدموع شديدة وهى تقول: "ناس معندهاش ضمير يعرونى فى الشارع وأنا ست كبيرة وكل القرية بتتفرج، وابنى هرب لأن لو شافوه كان قتلوه مكنش يعرف انه ممكن يعملوه كده فى ست كبيرة". سامحينا يا أمى وحقك علينا جميعآ فنحن فى مجتمع فيه من يريد أن يقتلنا جميعآ بالإحباط واليأس والقهر والتفجيرات والقتل ، والفتنه .. القضيه ليست قضيه الأقباط ولا البابا تواضروس ولا الرئيس السيسى بل قضيتنا جميعآ، وإذا لم نرد لسيده المنيا كرامتها التى أهدرت ونعاقب بقسوه من فضحوها فجميعنا عراة نستحق أن يزفنا العالم بفضيحه غياب النخوه والرجوله والجدعنه والشهامه والكرامه والانسانيه . لمزيد من مقالات أشرف صادق
