اه ياني ..صرخة آلم عارفه طريقها علي لسان كل واحد فينا و بنسمعها من غير كلام في تنهيده او نظرة تايهه ؛ مهما اختلفت الاوجاع الآه واحده طالعه مني ومنك "من جواك"، الآه بتخرج ممزوجة بوجع وتعب، لكنها احسن وسيله عشان تخرج اي شيء جواك، المهم والآه طالعه اعرف بتوجع ليه وفين واتأكد ان لكل داء دواء. ساعات كتير بندوب في مشاكل غيرنا عشان ننسي وساعات أكتر بنتوه في حاجات تانية ولا بننسي، المسكنات عمرها ما تعالج آلم ولا تمحيه ممكن تسكن بس لفترة أعرف وجعك سببه ايه وليه؟! انت قادر علي قهر أي وجع مهما كان وافتكر دائما قوله تعالي : " (لَا يُكَلِّفُ اللَّهُ نَفْسًا إِلَّا وُسْعَها)"حول طعم الألم لأمل، في كلمة ونص دواك جواك وعجبي ... عجبي ع اللي صرخ من تعبه آه ياني ما عدت قادر أشيل علي ضهري من تاني! وبعد ما كنت ملاذ أهلي وخلاني أصبحت رافع شعار شوف لك مكان تاني! عيني ع اللي انكوي بجراح مش ليه ولما أنجرح بالقوي والكل عجز يداويه! صرخ في الهوا صرخة رد الصدي قال إيه! يا طبيب الجرحي دواك جواك تلاقيه اهزم عجزك وابدأ الدنيا ياما فيها عشها بكل ما فيها احزن شوية و اضحك كتير اشتغل بضمير و العب وحب، حدد أملك وعالج آلمك بنفسك، أمشي في طريقك مهما وقعت اقف تاني وكمل عالج جرحك بأيدك فمن قلب جرحك دواك يا طبيب. أبتسم ثقة في نفسك أنك قادر علي مواجهة الحياة فربك هو الله وعلي كل شيء قدير. اخطف من العمر ولو لحظة سعادة وخليها في حياتك احلي عادة العمر كله ما يستهلش يعدي في لحظة وجع... لحظة وجع عرفت طرقها فاكرة انها هتعيش حياتها يا وجع علي فين طريقك ياجدع انا مش صديقك سيبك مني دا انا رغم همي عايش حياتي وعلي طول بغني وفي النهاية دي مش نصيحة، مجرد كلام ذابت فيه المعاني لتنسج زجل حروفه بطعم الحياة. [email protected] لمزيد من مقالات مى إسماعيل
