شفت وش جميل شف روحي الأسي أيام.. وكل ده يتنسي من قبل ما أنساه يكون اتنسي حتي الخيال.. الباقي..يتلاشي ويسيب ترابه الغايم الشفاف يعذبني.. لعل وعسي. قلبي النهاردة خفيف.. علي كل شيء كاين علي كل شيء بيكون هذا الوجود البهي الآسر..المنتهي.. حسرة علي الموجود. حسرة علي التفاصيل.. المخفي والباين في صنعة الفانيين. زايل بيخلق خيال الضل للزايلين.. تطمينة.. وكماين أعلي البهاء هاين..بمر الزمن حيمر زي ما مر يسحب ف روح المجرة ويحط ف النسيان. حسرة علي المحدود بالذكري, كالابريق.. فايض ومش مليان. حتي اللي ماشوفتوش حتي اللي ماسمعتوش و مالمستوش ومش حلمسه.. لفظ وبشر ووحوش.. أرض وكلام ووشوش لحن وكمال ورتوش قايم علي روحي.. زي الندا المجهول يا شط ما رحتوش.. ارحم كيان زايل ارحم كيان بيزول إنك هناك..موجود. مريت علي جنينة ومريت علي جنة مريت علي حية.. ومريت علي حوا وعرفت معني ربيع وعرفت معني خريف قلبي النهاردة خفيف.. من غير ولا أحداث أنا عايز اجرب كل الناس.. وانسخ ف روحي الوش والتعريف قبل الطوفان, بعده.. الصباح بيفوق ذهنه بياض ممدود عينه..فراغ ومخيف. قلبي النهاردة خفيف.