روى الفنان تامر حسني موقف حدث معه أمس عندما كان يحيي حفل زفاف بأحد الفنادق الكبرى، حيث أنه وجد شاب يطلب منه أن يلتقط صورة معه لينشرها تامر على صفحته الرسمية بموقع "فيسبوك"، مشيرًا إلى أن حبيبته تركته، وحرص تامر حسني أن يوجه له كلمة بعد أن لبى طلبه ونشر الصورة. تامر حسني وكتب تامر حسني تعليق على الصورة: " الشاب الجميل دا شافني داخل اغني في فرح وقفني و قالي انا بشتغل تقريباً ويتر هنا في الفندق و حبيبتي سابتني النهارده وانا زعلان اوي بس اول ماشفتك فرحت عشان بحبك جداً و طلب مني نتصور بموبايلي وأنا اللي انزل صورته عندي عشان يفرح و قالي انا إسمي محمود كان نفسي اتكلم معاه بس كنت داخل اغني المهم يا محمود يا جميل بما اني معرفش ايه الأسباب اللي بعدتكوا عن بعض وبما اني مش ناسي الحزن اللي كان في عنيك هكلمك هنا ... اكيد الدنيا مش هتقف بيك اهم حاجه تفضل تشتغل زي مانت كدا راجل و سيد الرجاله و ربنا ان شاء الله يصلحلك الحال و ممكن ترجعوا او هيكرمك بإنسانه مناسبه ليك اكتر و خلي الخير بينكم حتى في الإنفصال جايز قربكم مش خير لبعض ربنا يكتبلك الصالح و يكتبلها الصالح". وتابع: "أهم حاجه هوصيك بيها اشتغل و إكبر و إنجح و طور من نفسك .... مين عارف جايز بعد سنين ربنا يجمعني بيك تاني واشوفك صاحب الفندق اوعى تضحك و تقول مستحيل شغلانتك وانا صغير اشتغلتها بس طبعاً مش في فندق شيك زي دا ،كانت في مطعم أقل من بسيط و عشان راجل مايئستش فضلت ورا حلمي لحد ماوصلتله يارب توصل لحلمك انت و كل الناس و آدي صورتك يا عم منوره عندي اهي متأكد ان كلامي إشاره ليك مهمه خليك شاطر وإفهم الإشارة".
