حصل موقع «أهل مصر» على نسخة من نص تحقيقات النيابة العامة مع المتهم الأول التربي «رمضان محمد عقبي»، في واقعة اكتشاف أعمال سحر اللاعب مؤمن زكريا في مقابر الإمام الشافعي. وجاءت نص التحقيقات كالأتي: س/ ما هو قولك فيما هو منسوب إليك من إنك متهم وآخرين بالشروع في الاستيلاء على مبلغ مالى والمملوك للمجني عليه مؤمن زكريا عباس الضاوي، وكان ذلك باستعمال طرق احتيالية من شأنها إيهام المجني عليه بوجود سحر وأنه سبب في مرضه مستغلين ظروفه النفسية والمرضية إلا أنه خاب اثر جريمتك بسبب لا دخل لاردتك به وهو ضبطك والجريمة متلبسا على النحو المبين بالأوراق؟. ج/ محصلش س/ ما هو قولك فيما هو منسوب إليك من إنك متهم وآخرين بانتهاك حرمة الحياة الخاصة بأن قمت بنشر صورًا وأخبارًا كاذبة عن طريق الشبكة المعلوماتية منتهكا بذلك خصوصية المجني عليه مؤمن زكريا دون رضاه على النحو المبين بالأوراق؟ ج/ محصلش س/ ما هو قولك فيما هو منسوب إليك من إنك متهم وآخرين بإذاعة أخبار واشاعات كاذبة عمدا بقصد تكدير الأمن العام وإلقاء الرعب بين الناس وإلحاق الضرر بالمصلحة العامة على النحو المبين بالأوراق؟ ج/ محصلش س/ ما الذي حدث إذًا وما ظروف ضبطك وعرضك علينا؟ ج/ اللي حصل إني شغال تربي في مقابر سيدي عقبة في الخليفة وفي يوم كنت بزرع صبارة في الترب مرة واحدة وأنا بحفر لقيت كيس بلاستيك فامسكته وفتحته عشان اشوف فيه ايه، لقيت فيه لفتين وبفتح أول لفة لقيت مكتوب فيها طلاسم وحاجات مش مفهومة، واللفة التانية بفتحها لقيت فيها ثلاث ورقات بيض مكتوب عليها كلام مش مفهوم وفيها صورة كابتن مؤمن زكريا. وأضاف التربي في أقواله: صورة مؤمن زكريا لقيت مكتوب عليها بالأحمر كلام مش مفهوم ومدبس فيها أكتر من دبوس مكتوب عليها بالأحمر، وساعتها أنا صورتهم بالتليفون محمد جوز أمنية، واتصلت ب محمد إمام قريبي وقولتله على اللي أنا شوفته وساعتها هو قالي أن هو يعرف حد يوصلني لكابتن مؤمن زكريا، وبعد كدة لقيت واحد اسمه مصطفى ومعاه واحد صاحبه وقالي أنه قريب مرات مؤمن زكريا، وساعتها طلب مني أن يشوف الأعمال اللي أنا شوفتها في المدافن وأنا وريتهاله وقالي أنه مرات مؤمن زكريا هتتواصل معايا. وتابع التربي: بعدها بيومين لقيت كابتن مؤمن زكريا واتنين شيوخ وأبو مؤمن زكريا ومصطفى، وساعتها الشيوخ طلبت مني اجيب الأعمال عشان يشوفوها وبعدها قعدوا يطلبوا مني خل ومية وسلطانية على أساس أنهم بيفكوا الأعمال، وبعد كدة طلبوا مني أنهم يشوفوا المكان اللي أنا لقيت فيه الكيس دة، وريتهلهم والشيخ طلب مني أحفر شوية كمان وطلع ساعتها من التربة اللي جمب الحفرة حتتين فخار وسلك وبعد كدة حط زراعة الصبار وسقاها بمية مقرئ عليها قرآن وبعد كدة هما مشيوا. وأستكمل التربي في التحقيقات: لقيت محمد عمر بيقولي أنه صورنا وأحنا بنفك العمل وساعتها أنا طلبت منه أنه يمسح أي حاجة صورها عشان مينفعش تتاجر بمرض حد، وبعدين تاني يوم وأنا رايح أجيب علاج من الصيدلية بيقولي ايه موضوع مؤمن زكريا قولتله أن كان فيه أعمال ليه في الترب وفيه شيخ جه فكها وساعتها الصيدلي بيقولي أنا مصدقك، وساعتها روحت طلعتله الصور اللي كنت مصورها للأعمال والدكتور ساعتها طلب مني أن ابعتله الصور فبعتهاله بحسن نية، وبعد كدة لقيت حد بيتصل بيا وبيقولي أن هو جاري وبيسألني على موضوع مؤمن زكريا فحكيتله وبعدها لقيت المكالمة اللي كانت بيني وبين الراجل دا. وأضاف التربي: يوم السبت اللي فات لقيت رئيس المباحث بيتصل بيا وبيقولي أنا عند البيت عندك وعاوزك تيجيلي حالا وفعلا أنا رحتله عند البيت وقالي ايه ياعم اللي انتا عامله دا، وقولتله أنا معملتش حاجة وطلب مني إني أوريله مكان الحفرة اللي كان فيها الأعمال ووريتهاله وحكيتله على كل اللي حصل وبعد كدة راح أخدني وركبني ميكروباص وطلعنا على قسم الخليفة، وفي القسم طلعت وحدة المباحث وفضلت قاعد في المباحث لحد انهاردة الفجر وبعد كدة لقيتهم نزلوني الحجز والنهاردة جابوني على النيابة وهو دا كل اللي حصل. وقررت النيابة العامة، اليوم الإثنين، إحالة 5 متهمين بفبركة واقعة اكتشاف أعمال سحر بإحدى الجبانات بمنطقة الخليفة تخص لاعب النادي الأهلي السابق مؤمن زكريا، إلى محكمة الجنح.
