تمكنت قوات الإنقاذ النهري من العثور على جثمان محمد عمرو مصطفى البالغ من العمر 17 عامًا، لاعب نادي الكهرباء الرياضي والذي غرق في النيل خلال تدريبات له أمس. أصدقاء محمد، كشفوا لموقع وجريدة أهل مصر من أمام مشرحة زينهم، تفاصيل جديدة عن محمد والواقعة، وقال أحدهم: 'محمد كان بيلعب في نادي الكهرباء بقاله 8 سنوات وكان داخل ثانوية عامة السنة دي، محمد كان واخد 3 الجمهورية من 3 شهور، وهو شخصية كويسة الناس بتحبه وعنده قبول مش طبيعي، وبيحب لعبة التجديف'. وعن غرق محمد في النيل، أضاف: 'محمد كان عنده تمرين الساعة 7 الصبح، الساعة 9 الصبح غرق والنادي فضل يدور عليه ومكتب على الموضوع لغاية الساعة 4 لما ملقوش باليد حيلة بلغوا أهله الساعة 4، وروحنا النادي فضلنا لغاية الساعة 5 الصبح تاني يوم بندور عليه مش لاقينه ومكنش فيه غير لانش إنقاذ واحد بس اللي بيدور'. وأكمل: 'اللي حصل ده كله إهمال من النادي والمدرب ازاي اللاعب ينزل المياه من غير لايف جاكيت، حتى لو محمد كويس وبيعرف يعوم النيل ملوش كبير'. وتقرر نقل جثمان اللاعب محمد عمرو مصطفى إلى مشرحة زينهم، لإصدار تقرير الطب الشرعي بشأن تفاصيل وأسباب وفاته.
