سُباعيات الوجود و الموت

الوجود و الموت صُحاب .. خام الحياه
و الزمن تَعلَب شيطان .. خمّ الحياه
الوجود السرّ في سِير البَرايا
و الموت نهاية مُنتهي و بدأ البدايه
و قيامه قايمه .. رغم أنف الشِرك
سيرك الحياه فاتح لنا الألعاب
القلب صندوق .. و الهوي ساحر
يفتح لمين .. و لمين مايفتحلوش
و الحبل مفرود .. تحتنا .. لكن
مين مِننا .. رِجلُه ما بتخنهوش
الكُل داير .. في محيط الجذب
و الحلم عدّي .. للخيال العذب
و الغُرب في بلاد الخيال .. أحباب
الغُربه مش أوطان .. لكن نفوس
و النفس بتهاب الغريب .. لكن بتشتاقُه
كل الأماكن ونَس .. في عتمة المحبوس
و الموت براح الروح .. مهما السنين ضاقوا
يا مروَّحِين لله .. كل الدروب سالكه
لكن قلوب العباد .. بتوه ف 100 سكه
بين الهدي و البعاد .. يتمرجحوا الأسباب
الحُب زاد الحادي .. ف الرحله
و الحق وادي .. بين جبال الزِيف
المال يا كان .. مالي الحياه وحله
يا كان لمركب بحرها .. مجاديف
الكيف شيطان .. و العين صبي عطشان
و الروح نبي .. و النفس ضيف عشمان
ع الباب يناوله الأسئله .. وماينولشي الجواب
الكون رسايل .. و موجات الهوا شفره
و البسمه طابع بوسطه فوق الظرف
شوف كل صفحه .. فيها كام حفره
هيعدّي منها المعني .. وللا الحرف
عاش اللي غضّ الطرْف عن بُكره
دا الدهر فُوره .. و الخلود فكره
و الذكري صوره تايهه جوه كتاب
كل الكلام في الأصل كان .. كلمه
و الأصل في كل الكلام .. دا ..كُن
الصمت أنسب حاجه للضلمه
و النور ف قلب الكلمه كان ساكن
الدعوه طوق .. الرب للمُضطر
و الشوق عبور الضالّ .. لأول بَر
و الحضور.. في حضرة الكامل .. غياب
العُمر إيه .. غير انتظارُه ينتهي
و الصبر إيه .. غير انتظارك للفرَج
ازاي خَرَج للدنيا جسمك يشتهي
و ازاي ترك إسمك و م الدنيا خَرَج
كان الدخول .. أول مراسم للخروج
و القبر كان .. أول محطه للعروج
و النِيّه أول سِلّمه ف دار الحساب
الوجود .. و الموت .. صُحاب