«بكرة يحصل في إخواتكم»..سائق ميكروباص معدية أبوغالب يكشف ما قالته «سيدة» لشباب عاكسوا فتيات قبل الغرق (خاص)

في الجزء الخامس، من اعترافات المتهم الأول بقضية حادث ميكروباص معدية أبوغالب الذي سقط في نهر النيل، ما أسفر عن مصرع 16 فتاة وسيدة وإصابة 4 أخريات كن على المعدية في طريقهن من قرية سنتريس في المنوفية للعمل بإحدى مزارع العنب بمنشأة القناطر في الجيزة، روى أمام النيابة العامة، أنه حين نزل من سيارته بسبب معاكسة شباب للفتيات تركها دون كبح جماح الفرامل.
وأضاف المتهم في القضية التي تضم 4 متهمين آخرين، بينهم رئيس مركز ومدينة منشأة القناطر، أنه نزل مرة أخرى من سيارته «علشان الست الكبيرة اللي كانت قاعدة جنبي قدام قالتلهم بكرة يحصل في إخواتكم فاهما اتضايقوا، ولقيتهم نزلوا من التوك توك وجم علينا في العربية، وبدأوا يشدوا في الكلام مع الست الكبيرة وعاوزين يتخانقوا معاها».
المتهم «محمد.خ»- سائق ميكروباص معدية أبو غالب يكشف العديد من المفاجآت بشأن وسائل الأمان المتبعة في المعدية، إذ قال إنه رأى الحواجز الحديدية «كانت متسابة مفتوحة وأنا عمري مشوفتها بتتقفل على المعدية دي».
يُذكر أن محكمة جنح مركز إمبابة وكرداسة، حجزت نظر القضية إلى جلسة 4 نوفمبر المقبل، للنطق بالحكم.
وإلى نص التحقيقات:
س: وما هي وسائل الأمن والسلامة المتوفرة بتلك الناقلة؟
ج: المعدية المفروض بيبقى فيها حواجز من ورا ومن قدام وفي حواجز من الجانبين على اليمين والشمال، وبيكون فيها عوامات علشان الإنقاذ.
س: أمن ثمة حواجز أو حوائل مثبتة بالناقلة؟
ج أيوة هي متنقلة على الجنبين بحواجز حديدية بطول كل جانب الأيمن والأيسر بطول حوالي 11 سم والمفروض إن المطلع والمنزل اللي في مقدمة ومؤخرة المعدية بيستخدموا كحواجز عن طريق إن بعد ما المعدية تتحرك الحديدية اللي بتستخدم كمطلع ومنزل دي بترفع في اتجاه المعدية بحيث تمنع أي حاجة تقع في المياة بس دول مش بيترفعوا خالص في المعدية دي.
س: ما هي كيفية عمل تلك الحواجز؟
ج: الحواجز الجانبية دي جزء من هيكل المعدية وموجودة علطول، إنما الحاجزين اللي في مقدمة ومؤخرة المعدية دول لازم حد يقفلهم.
س: وما الغرض منها؟
ج: الغرض من الحواجز دي إنها تحمي الأشخاص والعربيات الموجودين على ضهر المعدية من إنهم يوقعوا في المياة.
س: أيتطلب ذلك الحاجز لعمله تدخل عامل بشري؟
ج: الحواجز الجانبية لا لأنها كده كده موجودة، إنما الحواجز القدام واللي ورا مش بتتقفل أوتوماتيك ولازم حد من اللي شغالين على المعدية يقفلها.
س: أكانت تلك الحواجز الأمامية والخلفية موصدة وقت وقوع الحادث؟
ج: لا، كانت متسابة مفتوحة وأنا عمري مشوفتها بتتقفل على المعدية دي.
س: وما هو مكان تموضع سيارتك على متن الناقلة عقب صعودها؟
ج: أنا كنت واقف بعربيتي في الصف اليمين آخر عربية ناحية المياة.
اقرأ أيضًا
«معييش رخصة قيادة وفضلت واقف مكاني».. مفاجآت جديدة في اعترافات سائق ميكروباص معدية أبوغالب (خاص)
شهادة مستشار وزير النقل في قضية غرق ميكروباص معدية أبوغالب تدين المتهم الخامس رئيس مركز منشأة القناطر (خاص)
«الواقعة حدثت دون عمد».. نص التحريات في قضية غرق ميكروباص معدية أبو غالب (انفراد)
س: كم تبلغ المسافة الفاصلة بينك وبين حافة الناقلة؟
ج: كان بيني وبين المياة حوالى 50سم.
س: لما تخيرت ذلك المكان؟
ج: مش أنا اللي اخترته، هو الشخص اللي بيركن العربيات وقفني في المكان ده.
س: وكيف استقررت بذلك المكان بسيارتك؟
ج: أنا أول ما يطلع بالعربية بفضل قاعد جواها ويبطل موتور العربية وبفضل مستني تعدي الناحية الثانية، وقرب ما بتوصل بدور العربية تاني ويستعد للنزول.
س: حال وقوفك بسيارتك أعلي الناقلة، كيف تؤمن استقرارها بموضعها على نحو يحول دون تحركها؟
ج: أنا يبطل موتور العربية ويفضل قاعد جواها.
س: وما هو المسلك المعتاد الذي تسلكوه حال الوقوف أعلي الناقلة منتظرين العبور للجهة الأخرى؟
ج: إحنا كلنا بنفضل في العربية ومحدش بينزل منها.
س: ما الذي دعاك إلى ترك سيارتك والنزول منها على عكس المعتاد؟
ج: علشان وإحنا راكبين في العربية كان في واحد راكب في (توك توك) جنبنا عاكس بنت من اللي كانوا راكبين معانا فأنا نزلتله علشان، اتكلمت معاه وقولتله ميصحش.
س: هل تقف على هوية ذلك الشخص؟
ج: لا، معرفهوش وكانت أول مرة أشوفه يومها.
س: أقمت بإيقاف محرك السيارة قبل النزول منها؟
ج: أيوة، أنا كده كده كنت مبطل العربية قبل ما أنزل.
س: أقمت باستخدام مكابح اليد للسيارة قبل النزول منها؟
ج: لا.
س: ما الذي حال دون استخدامك إياها؟
ج: لأن، أنا نزلت على غفلة على الخناقة.
س: ما هو سبب نشوب تلك المشاجرة؟
ج: علشان البنات اللي كانوا راكبين معايا العربية كانوا فاتحين الشبابيك لأن الجو حر وإحنا على المعدية حصل أن واحد راكب التوك توك موجود في المعدية جنب عربيتي ضايق بنت من البنات اللي كانوا راكين ورا والبنات قعدوا يزعقوا معاه، وقعدوا يقولولي الحق يا عم محمد فأنا نزلتله علشان اتصرف معاه.
س: ما التصرف الذي بدر منك إزاء تلك المشادة؟
ج: أنا سبت العربية ونزلت للواد اللي كان راكب التوك توك أتكلم معاه في الأول بالتراضي وكده، غلط ومش غلط.
س: وما آلت إليه تلك المشادة؟
ج: أنا لما اتكلمت مع الواد بتاع التوك توك واللي كانوا معاه هما سمعوا الكلام وسكتوا، وأنا طلعت عربيتي تاني وقعدت فيها.
س: وما سبب وكيفية تجدد الشجار فيما بينكم؟
ج: علشان الست الكبيرة اللي كانت قاعدة جنبي قدام قالتلهم بكرة يحصل في إخواتكم فاهما اتضايقوا، ولقيتهم نزلوا من التوك توك وجم علينا في العربية، وبدأوا يشدوا في الكلام مع الست الكبيرة وعاوزين يتخانقوا معاها.
س: ما التصرف الذي قمت به حينها؟
ج: أنا حوشت عنها وقعدت أقولهم عيب اللي بتعملوه وفتحت باب عربيتي ونزلت مرة ثانية أتكلم معاهم بس لقيتهم مسكوا فيا من هدومي.