أنا متحاصر.. جوه شوية طوب وبادور علي إسمي المشطوب من كشف التواريخ المنسيّة أنا ليا في عنيكي صور وماليش في قلبك مكان وانتي الحبيبة المؤذيّة يا ترجعيني طفل من تاني غرقان في أحزاني يا إما ترميني.. علي الشطوط المرميّة أنا مش غريب بس انتي دايما غريبة بتعشميني كتير وبتخلي بيا مش عارف مين فينا المجرم ولا مين المقتول ولا مين حيفتح للقمر شباك ويغني للمجهول ويقول دي أجمل أغنية كل اللي عارفه إني ماليش فيكي ولا ليكي.. فيّا. في الليل يطير.. يبقي عمود دخان يتجمع.. تلاقيه إنسان ماشي في شوارع قديمة منسية من أزمان وعيونه كانت خالية م الأجفان زي الطيور بيبص للشجرة وللفضا الواسع وما تعرفش إن كان رايح واللا كان راجع وقلبه متشعلق علي الأغصان لما تقرب له.. تلاقيه بيغمغم.. بكلام غريب وكإنه جاي من عالم تاني لاهوه إنس ولا هوه جان يطير.. يسافر للقمر ينده حبيبته اللي اختفت وسط النجوم وف آخر الليل يعيط تلقي الدموع نازلة مطر صافي ومغرقة الأرض الحزينة والأحلام يطير.. كأنه فرد حمام ويعدي علي كل البيوت سارح وسابح في هوا الملكوت يرمي علي الناس السلام والحنان مع إنه كان.. لاهوه إنس ولا هوه جان.