زي النبات .. قلبي بريء أخضر زي النهار .. كفّي رغيف مقسوم لو مسّني حلم البراح .. أَسكَر و ارقص ف ليل الجرح لمّا يزوم روحي/ خلايق بعترتهم ريح عيني/ صبايا ف الخلا تسرح وانتا اللي واخد يا ندي تصريح تلمس خدود الورد ، ف يفتّح ياما سقيتَك ضحكة للمجاريح والدمع طارح ع الرموش سُكَّر، يا ام النهار راجع بطعم البيت يا فرحة العمر اللي فات احزان بارت أراضي الصبر يوم ما نسيت أقطف ربيع الحلم .. نور وميزان مادد وريدي / جدر بيكي يقوم فارد دراعي غصن ؛ ف ارتاحي ليكي براءة طفل راح ف النوم ليَّ مرارة جرح بات صاحي تُهت ف هواكي ألف ليلة ويوم واضح مانيش ف العشق بتنكَّر، مين شال غيطان القمح من طيني زارع مكانهم م الحديد نخلات ! عريان يا توب الستر غطّيني دي عيون كماين والرموش حيّات طالع نخيلك يا حياة حِنّي ليكي انقسم سِنّي سواقي ونيل مِنّي علي قلبي يكون مِنّي واوعي لَ يِبري نور عيونك ليل راجع حمام العمر بيغني لا تاه ولا أبيض غناه اتعكَّر وداع الصبح فارس فوق جواد النور عاشق صبية من بنات الحور لمَّا انشبك طرف العيون بالورد قلبي انطلق للرزق طير مأمور والرزق إيه غير هز كف النرد! اوعاك تسيبني الخطوة تسرقني باعني الطريق للبرد يحرقني جاني المنام ما عرفتلوش تفسير نفس القميص يابا اللي برأّني برَّأ زمان اللي رموني ف بير البحر هايج بس هوجة ريم والشمس تاهت من عيون الهيم يا مفكرين خد السما مكسوف دا دم سايل فوق كمام الغيم لكن، عيون الذُعر مش بتشوف للميَّه صوت الخير و طعم الحزن يا ام الرموش السيسبان يِوْخزن اوعي تكوني البحر ما بيرويش خليكي دايمًا في الغرام / المُزن يِخْضَرّ عودِك في الزمان الهيش الرعشة ماسكة القلب؛ ضميني بردان ، ولسه الوحي بيجيني من يوم غيابِك يا (خديجةْ الروح) طارت حمامات بِيِض قصاد عيني واحتل باب الغار، حمام النوح سقوط الليلة يا هلالي .. راس الفرس نالها تراب الأرض ، والتمر طاب ع النخل للأغراب / باب الحبيب سدُّوه قصاد عينك وانت اللي مين ف الجرح هيعينك ! مديت كفوفك للسما و نخّيت / غصن و سقط .. يتهادي للحطاب يا زين مقام الجار : سابع قمر ف الجرح يتيتِّم ، ودموعه تنزف ضي فوق البيت . حتي الحمام .. ياصاحبي يوم ما مشيت حرمت عليه لَمِّةْ حكاوي الغار! طار فوق ديار فيها زمان خطِّيت / سالت عيونه ع المدي؛ فانصاب زيدي الجراح يا ريح زادك بكايا، والبكا زادي سال الحصا / دمع الجبال .. تسبيح بكَّي هشيم الرمل ف الوادي شِلتُه ف عيوني، و ف عيوني ضريح بِسْم الصبي .. الأرض بتنادي في كل نادي تقصده الأرباب مين يشتهيك يا طير، لو ضَلْ صوتك ف الخلا وبدّلت .. شهد الغُنا ب المُر عدُّودة شايل سنينك ذكريات ، والبنت .. لسه في ربيع الحلم مولودة فاض حُسنها بالشمس ف اتبسِّمت حاولت تواري ، والليالي عطاب ! ما عاش " خليفة " ف يوم أو مات علي صدر المغارب ضي إلا ميلاد لنهار جديد غالي النخلة تعشق جزعها الخالي عن تمر يعصي هزِّة المحروم ف اظفر بجرحَك ليلةْ يا هلالي ، تلقي النهار من نار جراحك طاب.
