مع كامل احترامى للأغنية التاريخية العظيمة وكمان مع تأييدى الكامل للفنان العبقرى محمد صبحى فى اعتراضه على مقولة "متقولش إيه إديتنا مصر". طول عمرى اسمع ناس كتير ومنهم أهلى بيرددوا نفس الفكرة وهم بيتناقشوا عن مصر وتلاقيهم بيقولوا "لأ..مش لازم نفكر مصر إديتنا إيه ولا عملت لنا إيه مش لازم عشان مصر دى أمنا ومفيش حد بيفكر الحاجة مامته اديتله إيه!!" ويرددوا الجملة الشهيرة "متقولش إيه إديتنا مصر" !!! بصراحة أتربيت على الجملة الجميلة دى لكن ساعتها ماكنتش بحاول أفكر فيها لأنها أتكتبت عليا وحفظتها زى ما هى كدة وأنتوا عارفين مفيش حاجة اسمها أن حد يفهمك شعر فى المدرسة "خد يابنى احفظ دى واحفظ معانى كلماتها وشكراً" بس لما كبرت شوية وحسيت أنى عبيط ومش بحاول افهم حاجات كدة اتكتبت عليا مع أنى مش عارف هى صح ولا غلط وفكرت للأسف... هو أحنا ليه مش بنفكر مصر اديتنا ايه ؟؟ سيبك بقى من مصر هى أمى والحضن الحنين ومفيش حد بيفكر مامته اديتله ايه والنيل كان بيسهر الليالى عشان أنا أكبر وأبقى عاطل زى الفل قد الدنيا كلها لأنه ببساطة فيه ناس كتير ليها أمهات لكنها مثلاً مسجونة ولا مطلقة ولا حتى أمهات غير صالحة وموجودين كتير يعنى الولاد عمرهم ما خدوا حاجة من أمهاتهم يبقى هاتقنعنى بقى أن الولاد ها يحبوا أمهاتهم كدة لله عشان يعنى أمهاتهم؟!! هو ده اللى أحنا محتاجين نفكر فيه لأننا لو فضلنا طول عمرنا بنقنع نفسنا أن مصر بتدينا كل حاجة وأحنا مش بنديها أى حاجة ومينفعش نفكر فى السؤال المحرم علينا ده وعيب ياولد تقول كدة على مصر ودى ماما حبيبتك يبقى عمرنا ما هانحب مصر من جوانا وهانفضل نضحك على نفسنا ونفاجأ بالشباب بيهاجر ويسيب البلد ويقتل وينتحر ويسرق لأنه ببساطة اتجرأ وسأل السؤال ده وفكر فيه وكانت إجابته "مصر أديتنا على قفانا"... كلامى ده مش معناه أن مصر مديتناش أى حاجة خالص لكن طول ماحنا معتمدين على أن مصر بتدينا كل حاجة وأحنا مش ولاد أصول ومش بنديها حاجة لا عمرنا أحنا هانوصل للى أحنا عايزينه ولا مصر هاتتقدم ولا ياسلام على بعض المسئولين اللى معتمدين على الجملة دى وبيستغلوها أنهم يقولوا للناس أدوا لمصر كل حاجة بس ما تستنوش منها حاجة!!! ياسلام؟؟ ياسيدى أحنا بنى آدمين ولازم نفكر بعقلنا ونفهم كل حاجة قبل ما نعملها وأيه اللى لينا وأيه اللى علينا مش نفكر إيه اللى علينا وحرام نفكر إيه اللى لينا !! ليه عايشين فى بلد خيرى!! الإنسان الطبيعى بيفكر كدة وإحنا عايزين نبقى ناس طبيعيين مش عايزين أكتر من كدة. وتلاقينا دايماً نقول ونفتخر أوى أننا مش بنفكر مصر بتدينا ايه لكن من جوانا مش بنبطل تفكير لحد ما الاحساس ده يموت ونفقد الامل ويبقى ده العادى وعلى فكرة لو أنت من اللى حاسين أن مصر مديتهمش حاجة أول ما هاتجيلك الفرصة ها تجرى يامعلم وتسيب البلد...ليه ؟ عشان أحنا مش ملايكة وعايزين احسن حياة ونعيش عيشة كويسة وكريمة.. أحنا بنى ادمين وبنفكر بالعقل يعنى اليوم اللى الناس كلها هاتحس أن مصر مديتهمش أى حاجة عمر ما حد هايبقى على مصر لا تقولى بقى أمه ولا أخته ولا حتى حبيبته . عشان كدة لازم نصلح مصر بجد نخاف عليها بجد نطورها بجد ومن قلبنا ونعمل كل حاجة كويسة ليها عشان لما تدينا نبقى عليها ونستحملها مش نفضل طول عمرنا ندى مصر وهى ولا تدينا حاجة !!!
