أحمد :هل أنت مع بيع القطاع العام؟ أنا مع فكرة تغيير نمط إدارة القطاع العام، بس مش مع فكرة بيع القطاع العام بالطريقة التى بيع بها ... أحب الدكتور محمود محى الدين منذ أن كان زميلى وصديقى فى مرحلة الثانوى، فى اتحاد طلاب الجمهورية، أنا كنت أمين اتحاد طلاب الجمهورية، وكان هو الأمين المساعد، وأنا أثق إن هو إنسان وطنى وإنسان جميل، بس أنا حقيقة مش فاهم هو ايه اللى هو بيعمله ده .. مش فاهم إزاى حد بثقافة ووطنية وتاريخ أسرة محمود محى الدين إزاى ممكن يتورط فى موضوع زى الصكوك الساذج العبيط دا؟! .. إزاى يبقى الموقف من القطاع العام بهذا الشكل الذى يمثل أقصى أشكال السفه والإهدار لثروة مصر القومية . أنا مش من أنصار إن القطاع العام يبيع "بيض" ولا إنه يبقى فى ترزى قطاع عام، ومقدرش أكون مع ده، لكن برضه مقدرش أكون مع اللى بيحصل ده، إحنا لنا مفهوم مختلف للخصخصة، الخصخصة ليست هى البيع، الخصخصة هى طريقة إدارة، وروح إدارة، ومفيش مانع عندى أبدا إن يكون عندى مؤسسات تدار وفقا لمفاهيم تتفق مع الخصخصة، لكن من خلال الحكومة، مفيش مانع، لكن إيه المعنى إن إحنا نتكلم عن بيه اقرب إلى السفه، زى اللى حصل مع عمر أفندى .. أنا بقول هذه ليست خصخصة، وأزمة الحركة الليبرالية في مصر أنها مأذومة بسرقة شعاراتها ومفاهيمها وتفريغها إلى شكل مشوه وشائه، بعيد كل البعد عن مضامينها الحقيقة. الصورة الذهنية اللى بقت مترسخة عن الناس، صورة ظالمة لأصل الفكرة، إن هى مش بيع، إنما اللى بيحصل دا بيع بالبخس، وبيع بتبديد الثروة، وبيع بالتواطؤ، وكسب غير مشروع، وله 500 ألف تانى غير الخصخصة .. أنا مستعد أتنازل عن ليبراليتى فى مقابل الحفاظ على ثروة بلدى، ومعنديش أى حرج إنى أقول إن هذه الوقت غير مناسب لأى بيع جديد فى مصر، وكل ما تم فى حاجة إلى مراجعة ومحاسبة ومحاكمة فى بعض الحالات .
