أخى أمام ديوان المظالم أنا عاذرك أكيد لك سنيين مظلوم كلنا فى العهد الماضى كان حقنا مهضوم ياما تقدمت بطلبات للمسئولين كان مصيرها الزبالة أو تقطع قصاقيص بالماكينة مفروم طلباتك و طلباتى فى بئر الإهمال وعليها غطا النسيان مردوم أو مسئول يضع على الطلب تأشيرة بكلام مش مفهوم علشان تفهمه لازم تعمل عليه زووم وآخر يرجعك لأن طلبك بالشعار غير مختوم ولو عملت كل المطلوب درج مكتب الموظف مفتوح لازم تدفع المعلوم روتين عقيم عطل مصالح ناس لسنيين بينما كان يمكن تخلص فى يوم ثلاثين سنة عجاف مرت علينا من ساعة ما شفنا المشؤم كانت سياسته أن الباتون ساليه للحاكم والفايش للمحكوم ولكن العتب مش عليه هو العتب على اللى جابه للحكم بحجة أنه من كفر المصيلحة وبلدياته من ميت أبو الكوم أخى: حط همك على همى احنا زملاء كفاح لسنا من علية القوم مرت عليك أيام صعبة وباليل دمعتك على خدك تنام مهموم عايل هم العيال تشربهم وتأكلهم منيين حتى ولو برغيف عيش اللى بالمسمار مدعوم غيرك أكلة كفيار وشربه ميه وأنت بتكمل عشاك نوم ولو فرجت بطبق فول على رسلكم يا أولادى وانتوا بتأكلوا فإن النعمة لا تدوم الحمد لله دبرنا فلوس الفول نعمل جمعية علشان نشترى الهدوم وطوابير بطالة من سنيين لو اردت أن ترصهم ورا بعض لن تكفى المسافة من أسوان للسلوم شعب عانى الكثير ومن أبسط حقوقه كان محروما أخى: أمام ديوان المظالم أنت متعجل الحل طلبك تقدمت به امبارح تريد إجابة عليه اليوم أنت لك الحق فى كل ما تطالب به والحكومة لا بد تلبى طلبك ليس عليك لوم سيادة الرئيس بنفسه ومعه لجان لفحص الطلبات ثم تحولها للمسئول علشان يكون بحلها ملزوم الكل جاء من كل صوب وحدب وافقين فى طوابير صحيوا قبل الفجر ما كملوش نوم مشاكل لها العجب: دا بيحلم فى سكن آدمى من سنيين ساكن فى أوضة فى بدروم أفراد أسرته سبعة لما يناموا جنب بعض بيعملوا كوم وواحد آخر حضر معاه أولاده بيعانوا من مرض غريب من ساعة ما ولدوا رايحيين فى النوم ومحمد عنده خمس سنيين بطنه بطيخة يحتاج زراعة كبد الحقوه يا قوم وشاب عاوز شقة وعروسة لأجل يعف نفسه خوفا من الوقوع فى المحظور أو عليه بالصوم وخريجين من كل التخصصات ومن كل العلوم أملهم فرصة عمل من رئيسهم الجديد تكون منه لهم بمثابة حلاوة القدوم نحن فى شهر الخير ادعى لك ولغيرك بكل خير ولا تدع بشىء مذموم إن شاء الله نرى شىء ملموس وحلول لا غلب المشاكل خلال المائة يوم
