ياما نفسى يبقالك يا بلدى زعيم وطنى بيحبك ويكون حكيم وأخده قدوة ليّا أنا وغيرى ويبقى محبوب من كل المصريين يكون يا بلدى عليكى بيغير وبروحه يفديكى وعنده ضمير ومهما يعمل عشانك يفضل حاسس إنه مديونلك يا بلدى بكتير يكون راجل بجد تتعلم منه الرجولة مناضل وتصرفاته عاقلة ومسئولة مايكتمش قول الحق وللظلم يقول لأ ولو شاف يوم فساد ماتتبلش فى بقه فوله يكون يا بلدى حاسس بمشاكلك شرب من نيلك وأكل من أكلك يقويكى ويخليكى لقمة ناشفة فى عين كل اللى فاكرك سهلة وممكن ياكلك مش فارقة يكون فلاح أو صعيدى ولا فارقة إن كان اسمه صلاح أو اسمه هريدى المهم يكون مصرى أصيل ياخد يا بلدى بإيدك وإيدى وياريت يكون كمان هادى وراسى ومايكونش عنده جنان بالمناصب والكراسى ويكون ابن حلال مايتشراش بمال يخلينى أفخر بيه وأشيله على راسى ياما نفسى يبقالك زعيم يا بلدى جدع وطيب وابن ناس متربى فيه كل الصفات اللى فى الكلام اللى فات ويا سلام كمان لو يكون واد حليوة وشبهى