وكمان خمسين من أحبابه! م المجلس ياما بكره نشوف إيه لسة مخبى فى جرابه؟ يا خساره يا حزب الإخوان أديتك صوتى وندمان أنا بكره هاروح أسحب صوتى والمجلس يقفل أبوابه ...... لجنتكوا لأجل الدستور فيها صوره من (فتحى سرور) وملامح (صفوت) و(شهاب) ورزالة (عز) المغرور وكمان مجلسكم معطوب علشان ماشيين بالمقلوب وقلعنا العمة ولبسنا فى جمال أيامكم طرطور ...... ما تجيبوا كمان المخلوع مش فارقه وياكوا كتير ويركب دقن ويصبغها بالمره لزوم التغيير وأهو أحمد يبقى الحاج أحمد ونبدل بطرس بمحمد والاسم اللى مايعجبكوش يفارقكم من غير تفكير ...... المجلس والأخ (كتاتنى) المخلص أبو قلب كبير فاكرين إن مافيش غير هما اللى بيفهموا فى الدساتير وكأن مافيش مستشارين ولا حد بيفهم فى الدين وكأن مافيش ألف فقيه فى الجامعة وفى غيرها كتير ...... مجلسكم اسم الله عليه الناس بيقولوا مشكوك فيه يعنى على كف العفريت ممكن فى دقيقه يرميه وف ثانيه يتشقلب حاله وساعتها نشوف حد بداله والعيب اللى أنتوا كشفتوه مش هايلاقى حد يغطيه ...... أنا قايل ف قصيدة زمان أنا كنت بحب الإخوان لكن بصراحه عمايلهم هاتجيب لى فى العقل جنان وإذا قالوا عدالة وحرية راح أقول فيها قرع وتقلية وهايزرعوا مصر المحروسة كوسه وتقاوى بدنجان