قالت الفنانة حورية فرغلي: "فنانين كتير كلموها بعد ما طلعت فى اليوم السابع، ولما كلمونى كنت بعيط لما الكورونا كانت قافلة السفارة والدكتور الوحيد اللى ممكن يعملهالى فى أمريكا والسفارة مقفولة وبعد ما عملت حوار مع اليوم السابع حد من مجلس الوزراء كلمنى وقال لى من بكرة الصبح حد هيكون الساعة 10 الصبح معاكى فى السفارة الأمريكية وفتحولى السفارة وكنت لوحدى خالص وأدونى خمس سنين ومش عارفة أشكر مين ولا مين والناس حست بيا ورجعت تليفزيون وصحفيين فى المطار كانوا منتظرنى كله ده وده أدانى وأنا رجعالكم وهعملكم أحلى أعمال ولسه فيه عملية كمان". روت الفنانة حورية فرغلى رحلتها العلاجية التى أسفرت عن إجرائها لنحو 17 عملية جراحية قائلة: "رحت فى الأول كنت فاكرة أنها عملية واحدة لكن فوجئت أن الطبيب قلى لا 4 عمليات وهتقعدى معانا أربع شهور وبين كل عملية والتانية 3 أسابيع ومدة كل عملية 12 ساعة ".
تابعت فى لقاء خلال برنامج " كلمة أخيرة " الذى تقدمه الإعلامية لميس الحديدى على شاشة " ONقائلة: "الموضوع كان مرهق جدًا جدًا وكنت بعمل العمليات فى شيكاغو عند طبيب من أمهر الأطباء رشحه لى الدكتور حسام فودة ".
وكشفت أنها بعد العمليات الأخيرة عادت لها حاسة الشم والتذوق مجددًا قائلة: "ماكنتش عارفة أنا بأكل إيه بقالى 4 سنين مكنتش بشم أى برفان وكنت بشرتيها لو الإزازة شكلها حلو من غير ما أعرف ريحتها ".
استطردت: "مكنش هاممنى شكلى قد ماكنت عاوزة أعيش عاوزة أعيش وأشم الروايح وأستطعم الأكل وأخر حاجة كنت بفكر فيها أن شكلى يبقى حلو".
وكشفت أنه بالرغم أنها فقدت الثقة فى نفسها على مدار ال4 سنوات الماضية لكها كانت تهدف بالأساس لاستعادة صحتها قائلة: "كنت فقدت الثقة فى نفسى وحاطة فويل ورق القصدير على جميع المرايات عشان ما بصش لنفسى خالص لمدة عامين وكنت أعانى من الاكتئاب ".
وذكرت أن أصابها بالصدمة هو اختفاء كل من حولها بعد الإصابة والمعاناة قائلة: "كل الهوليلة اللى كانت حواليا اختفت بمجرد سقوطى سواء اللى عاشرونى عشرة أو 15 عامًا ومن ساعدتهم على الزواج ووقفت بجوارهم كلهم اختفوا لما وقعت "
وردًا على سؤال الإعلامية الحديدى: دول كانوا أصحابك؟ لترد: "التيم بتاعى كله تصورى تليفونى مكنش بيرن وكنت بقول لنفسى هل كنتوا حواليا عشان شغالة كتير وقتها؟!".
وردت فرغلى على مظاهر التنمر على صفحات السوشيال ميديا قائلة: "كان كلام سخيف بعضهم يقولى انتى بقيتى مسخ دميمى ويحطوا صورة أبو الهول وأنا جنبه ويقولوا ما الفرق؟! ويقولولى أنتى شكل مايكل جاكسون".
واصلت: "كنت فقدت الثقة فى نفسى وحسيت أنى وحيدة كنت ماعنديش علاقة عاطفية وعايشة لوحدى وكل حاجة اتقفلت فى وشى وكنت بتمنى الموت وبقول لنفسي: واحدة زيى عايشة ليه ؟!.
